Melvile / Romain Renard

Posted: 11 Ebrel 2014 in Bannoù-treset
Tikedennoù:

Melvile a zo ur vannenn-dreset gant Romain Renard embannet e 2013 ‘ti Le Lombard (136 pajennad).

Skrivagner eo Samuel Beauclair. Berzh bras en deus graet e romant kentañ. Koulskoude, ne zeu ket a-benn da skrivañ ken. Ne ya ket mat an traoù gantañ. N’en deus nerzh evit netra ha ne dremen ket
mat an traoù gant e wreg. N’emañ ket pell an diwaskadenn…
O vont d’an ispiserezh e wel ur c’hinnig-labour. Klask-zo war unan bennak evit ober labourioù war toenn un ti. Soñjal a ra da Samuel e raio mat dezhañ labourat gant e daouarn hag er-maez. Pellgomz a ra, un emgav ‘zo kemeret. Ha setu eñ da gejañ gant David hag e c’hoar yaouank Rachel.

Brav-kenañ ‘m eus kavet tresadennoù Romain Renard. N’ouzon ket resis peseurt teknikoù ha binvioù a vez implijet gantañ met an disoc’h a zo a-feson, etre tresañ ha livañ. Al labour war al livioù hag ar gouloù (sklêrijenn, skeudoù, teñvalijenn) a zo dreist, dreist-holl ma plij deoc’h an tonioù sepia.

N’eo ket dre ret dreistordinal an istor met heuliet e vez aes hag ar fin am eus kavet deuet brav, daoust ma c’heller marteze divinout an traoù a-raok…

Preder, karantez, suspens… Aliañ ha ran deoc’h Melvile, ur vannen-dreset brav-tre ha kreñv.

Tu zo lenn ar penn-kentañ amañ, war lec’hienn Le Lombard.

Bonusoù a zo el levr evit ar re o deus ur smartphone pe un tabler met n’am eus ket bet tro d’o gwelet.

Advertisements

Hatufim (bloavezh 1)

Posted: 1 Ebrel 2014 in Stiradoù
Tikedennoù:, ,

Anavezout a rit marteze ar stirad amerikan Homeland ?
N’am eus ket bet tro d’e welet met awenet eo bet gant ar stirad-mañ, Hatufim, sevenet e 2010 gant Gideon Raff evit ar chadenn israelian Aroutz 2.
2 bloavezh a zo, gant 10 rann er bloavezh kentañ ha 14 en eil (rannoù 50mn well-wazh).
Er C’hwec’hkorn ez eo bet skignet ar stirad gant Arte adalek miz Mae 2013.

Tri soudard israelian a zo bet skrapet gant ur strollad sponterien islamist. E-pad 17 vloaz ez int bet bac’het ha jahinet e Siria. Kriz-kenañ eo bet an traoù. Unan anezho (Amiel) a zo marvet du-se zoken. Ur marc’had a zo bet asantet gant pennoù-bras Israël ha dieubet eo an daou all ‘benn ar fin,, ur seurt eskemm ‘enep dieubidigezh prizonidi an tu all.

Hatufim (« skrapet » e hebraeg) a heul buhez an daou brizoniad o tistreiñ, Nimrod hag Uri, hag o familhoù. 17 vloaz goude, un toullad traoù a zo cheñchet evel ma c’hallit ijinañ.
Hep mont re bell gant an istor e c’heller lâret ez eo dimezet en-dro Nurit, gwreg Uri, ha gant e vreur ouzhpenn !
Familh Nimrod a zo brasaet, gant ur mab n’en deus ket bet tro da anavezout (dougerez e oa Talia p’eo bet skrapet).
Heuliañ a reer ivez Yael, c’hoar Amiel, he deus gortozet he breur e-pad 17 vloaz evit netra. N’eo ket distroet, siwazh dezhi.
Heuliet a dost e vez ivez Uri ha Nimrod gant an arme rak soñjal a ra dezho e c’hallfent kuzhat traoù. Aon o deus e vefent gwazourien doubl, a labourfe dre guzh evit an tu all bremañ.

E keñver stiradoù all e c’haller lâret e kemer Hatufim e amzer. Ar rann gentañ da skouer, tost d’un teulfilm a-wechoù, a laka an tudennoù hag an istor e plas trañkilik. Met adalek an eil eo lañset ar mekanik.
Daoust d’ar sevener filmañ pep tudenn en un doare don (psikologiezh hag all), ne gaver ket hir e amzer rak kalz suspens a zo. Kalz traoù a chom dianav deomp ha c’hoari fin a ra ar senaristed gant ar flashbacks, ar pezh a zo c’hoarvezet gant Uri ha Nimrod ‘pad o bac’hidigezh. Dibenn pep rann a ro c’hoant bras goût hiroc’h setu ez aer buan betek ar fin.
Rann diwezhañ ar bloavezh kentañ, hiroc’h un tamm ‘vit ar re all, a zo a zoare. An ardreuzadoù etre an tudennoù a zo efedus ha kenedus hag ur c’hliffangher spontus a zo er fin tout, evit bezañ sur e sellfemp an eil bloavezh, met chut…

Barrek-spontus eo an aktourien dre vras. An daou aktour pennañ dreist-holl, Yoram Toledano (Nimrod) hag Ishai Golan (Uri) dreist-holl, met ar re all ivez dre vras. C’hoari an aktourien mui dibaboù ar sevener a laka an traoù da vezañ fromus-kenañ alies.

Kendrec’het on bet buan gant ar stirad, a zo a galite uhel, ha kenderc’hel a rin ganti a dra sur.

Plijus ‘m eus kavet ivez gwelet se e yezh orin. Hebraeg em divskouarn neuze. Forzh penaos, zoken pa ne gomprenan seurt (hebraeg, daneg, islandeg…), e plij din kalz gwelet an traoù e YOIT. Ar yezhoù a blij din ha n’on ket evit gouzañv an advouezhiañ ken.
Ar film-tañva

Bored to Death (bloavezh 1 ha 2)

Posted: 31 Meurzh 2014 in Stiradoù
Tikedennoù:

Bored to Death a zo ur stirad fent amerikan bet krouet gant Jonathan Ames (skrivagner eo ivez*) ha skignet enno gant HBO adalek 2009.
Tri bloavezh a zo, gant 24 rann 23mn en holl (8 dre vloavezh).

Jonathan a zo ur skrivagner hag ul loser anezhañ. Ne zeu ket a-benn da skrivañ e eil romant, kuitaet eo gant e vignonez (er rann kentañ). Tremen a ra e amzer o butuniñ hag o lonkañ, e-unan pe gant e vignoned Ray ha Georges. A-wechoù e klask skrivañ memestra, met n’eo ket gwall efedus.

Sod eo Jonathan gant ar romantoù-polis. War-lerc’h bezañ bet adlennet Chandler e teu ur soñj dezhañ. Evit lakaat un tamm buhez en e hini, kavout traoù da gontañ evit e romant, ha perak pas, gounid un tamm arc’hant, e tiviz Jonathan heuliañ skouer Philip Marlowe ha mont da igounier. Lakaat a ra neuze ur c’hinnig-labour en-linenn gant ar spi kavout pratikoù.


Adal neuze e c’hoarvez a bep seurt istorioù dic’hortoz dezhañ. Evel-just ez eo nul Jonathan evel igounier met dont a ra a-benn da ziskoulmañ e enklaskoù peurliesañ, pe gant chañs pe dre gendegouezhioù. Droch a walc’h eo an ton arabat gortoz traoù sirius met farsus-tre dre vras.
An aktourien pennañ a zo barrek ha dreist eo an tudennoù pennañ.
Jonathan neuze, met ivez Ray (Zach Galifianakis, gwelet e Very Bad Trip da skouer), un treser bannoù-treset ken loser all, pe c’hoazh George (Ted Danson) embanner Jonathan, e penn ur gazetenn, lonker ha merc’hetaer daonet.
Ur c’hameo farsus a zo gant Jonathan Ames, a seblant ivez bezañ ur furlukin er vuhez gwirion (s.o. bonusoù an DVD).



Tremen a ra buan-kenañ ar bloavezhioù rak n’eo kat gwall hir ar rannoù na gwall uhel an niver a rannoù dre vloavezh.

Da welet evit c’hoarzhin ma plij deoc’h ar fent droch (My Name is Earl, Black Books…).

Da lenn ivez : ali Geekezig war ar bloavezh kentañ hag an eil.

Ur pennadig, da dañva

*A-raok ar stirad e oa un danevell, a c’heller lenn e galleg en dastumad Une double vie, c’est deux fois mieux (embannet gant Joëlle Losfeld).

La cour de Babel a zo un teulfilm gall gant Julie Bertucelli, deuet ‘maez ar miz-mañ (1e29).

Diskouezh a ra deomp ar film bed ar « c’hlasoù degemer », klasoù graet a-ratozh evit krennarded deuet eus an holl gevandirioù ha ne gomzont ket galleg tamm ebet, pe ket a-walc’h evit gellet bezañ lakaet en ur c’hlas boutin. Kentelioù galleg o deus dreist-holl. Pa grog da vezañ dereat o live galleg e vezont lakaet evit danvezioù-zo (mat, fizik…) e klasoù boutin. Tamm-ha-tamm e vezont lakaet evel-se er sistem boutin.

Heuliañ a reer a-dost, e-pad ur bloavezh skol, ur strolladig krennarded deuet eus ar bed a-bezh. Disheñvel krenn eo planedenn pep hini. Traoù kriz a zo bet bevet gant lod anezho (brezel, gouennelouriezh…). Gant lod all tamm ebet, deuet int da heul o c’herent evit abegoù labour pe familh. O familhoù a c’hell bezañ paour pe binvidik, bevañ a reont e kambreierigoù pe e tiez bras.
An darn vrasañ anezho a zo mennet-tre da zeskiñ ar galleg evit dont a-benn da studiañ ha perak pas mont betek ober studioù hir e Frañs. Ur grennardez a Roumania a faot dezhi mont da vedisin, un Ejipsian a garfe bezañ tisavour.

Dreist e seblant bezañ ar gelennerez galleg, heuliet a-dost eo ar grennarded gant ar skipailh.

Mareoù farsus a zo, mareoù fromus-tre ivez. A bep seurt traoù a zo en teulfilm-se, leun a vuhez.
Ur film brav, a ro spi en-dro en denelezh… Ket evel disoc’hoù an dilennadegoù da skouer…:(

Ar film-tañva

Fabien Nury a gustum skrivañ istorioù dreist, evel Il était une fois en France. Petra ? N’ho peus ket lennet ar stirad-se (6 levrenn) c’hoazh ? Kit diouzhtu d’ho levraoueg/stal-levrioù !
Ur blijadur ouzh e adkavout neuze, gant un treser all, Brüno.


Diaes komz eus one shot kement a boledoù a vez tennet el levr-mañ ! Met n’eo ket an istor-mañ hini kentañ un heuliad atav.

Tyler Cross a zo ur gangster mod kozh. Prest eo da laerezh met ivez da lazhan, keit ha m’eo paeet mat. Kinniget e vez dezhañ gant ur mafioso kozh c’hoari un dro-kamm d’unan all ha da laerezh digantañ 20kg heroin digemmesk. Un tamm diaesoc’h ‘vit raktreset ‘vo an taol met boñ, ne digalonekaer ket Tyler Cross evel-se. Kenderc’hel a ra gant e hent betek en em gavout en ur gêr dalc’het penn da benn gant ur familh. Ar postoù a gont : sheriff, maer, rener an ti-bank… a zo gant ar familh Pragg dibaoe bloavezhioù. Ha ma cheñchfe an traoù ?

Kazi kant pajennad a zo gant ar vannenn-dreset met ken fonnus eo ar senario n’hon eus ket tro da gavout hir e amzer un disterig. Efedus ken-ken eo tresadennoù Brüno : peps ha livioù flamm. Paouez a reer buan da gontañ ar c’horfoù marv laosket gant Tyler Cross war e lec’h.

Plijus-tre am eus kavet ar vanenn-dreset-se, a alian deoc’h, dreist-holl ma plij deoc’h an istorioù mod western.
N’on ket be ma unan o vezañ plijet, pell alese : gounezet o deus Nury ha Brüno ar priz BD Fnac 2014 evit Tyler Cross.

 

Tyler Cross, Fabien Nury (senario) & Brüno (tresadennoù), Dargaud (2013), 90 pajennad.

La tour fantôme, 1, gant Taro Nogizaka (istor ha tresadennoù) a zo levrenn gentañ ur stirad manga. 7 a zo hiziv e Bro Japan met n’eo ket echu an istor c’hoazh.

Ne dro ket mat-tre ar bed gant Amano Taichi. Chom a ra er gêr an devezh ‘pad, betek ma rankfe kavout un diskoulm evit gounit arc’hant goude ma vije deuet ar berc’hennez da c’hourdrouz anezhañ d’e skarzhañ ma ne baefe ket ar feurm buan. Adkavout a ra Amano ur vignonez lise dre zegouezh. Evit brabañsat e lâr dezhi e vo pinvidik a-benn nebeut dre ma c’hortoz un hêrezh. Un den yaouank, bet klevet kement-se dre zegouezh, a ginnig da Amano klask gantañ un teñzor, a vije kuzhet en un tour, satanazet a-hervezh goude ma vije bet muntret enni ur vaouez gozh gant he merc’h.

Deuet ‘maez dec’h, La tour fantôme a zo azasadur Yûreitô, romant Ruiko Kuroiwa (embannet e 1899 e Bro Japan), a oa dija azasadur A Woman In Grey, gant Alice Williamson (Bro Saoz, 1898). Brudet eo un tamm an istor-se e bro an heol o parañ dre m’eo bet azasaet ivez gant Edogawa Ranpo, mestr ar romant-polis du-hont.

E 1954 e krog an istor, daou vloaz goude muntr ar vaouez gozh war orolaj an tour. A-raok kemer un diviz ‘keñver kinnig ar paotr yaouank e ya Amano da weladenniñ an tour. Taget e vez ha darbet eo dezhañ bezañ muntret. Savetaet eo in extremis gant Tetsuo, ar c’hlasker teñzor. Dre m’en deus hemañ savetaet e vuhez e tiviz neuze asantiñ d’e ginnig ha kregiñ an enklask…

El levrenn gentañ-se, a ro lañs d’an istor, ez eus dija kalz suspens, hag un toullad dazlammoù. Un tun fin a vez implijet gant Taro Nogizaka evit ma ouife al lenner muioc’h a draoù evit Amano. Ral a-walc’h eo kement-se ha reiñ a ra un dro dedennus-tre d’an istor.

Daoust d’an istor orin bezañ bet skrivet en 19vet kantved, an azasadur-mañ a lenner digudenn bremañ. Savet eo bet en un doare fin senario al levrenn-se ha brav eo ivez tresadennoù Taro Nogizaka. Deuet eo brav ar rann gentañ-se rak kevrinus a-walc’h eo evit reiñ c’hoant da lenn al levrennoù da zont. An eil hini a vo embannet e miz Mae gant Glénat.

 

La tour fantôme, 1 (Yûreitô, 1, 2010), gant Taro Nogizaka, Glénat (2014). Troet diwar ar japaneg gant Victoria Tomoko Okada, 224 pajennad.

Ida / Pawel Pawlikowski (2013)

Posted: 17 Meurzh 2014 in Sinema
Tikedennoù:,

Ida a zo ur film polonad (drama) sevenet gant Pawel Pawlikowski ha deuet ‘maez er c’hwec’hkorn e miz C’hwevrer (1e19).

Pologn, bloavezhioù 1960
Ida a zo un emzivadez yaouank graet ganti an dibab mont da seurez. En ur c’houent e vev ha ne vo ket pell a-raok ober he le. D’ar mare-se e erru ur moereb dezhi (Wanda, ezel nemeti he familh bev atav), barnerez a vicher, a ginnig dezhi mont d’he heul da c’hoût hiroc’h war he familh ha marv he zud. Ne dro ket mat-tre ar bed gant Wanda met ur vuhez rock&roll he deus e-keñver hini Ida ha setu ar plac’h yaouank da zizoloiñ ar sonerezh, ar baotred… Hag ar moereb da c’houlenn gant Ida m’eo sur kaout c’hoant mont da seurez ?

Ha neuze, petra raio ?
C’hwitet, ne lârin ket deoc’h muioc’h, ‘po ken sellet ar film.

Dibaboù kreñv a zo bet graet gant ar sevener : filmañ e gwenn ha du ha gant ur stern kazi karrez. Deuet eo brav an disoc’h, evit talennoù-zo dreist-holl met evit ar filmañ dre vras. C’hoari fin a ra Pawel Pawlikowski etre ar pezh a zo er stern hag ar pezh a zo ‘maez ar stern. Ampart-tre eo an div aktourez : Agata Trzebuchowska, a c’hoari perzh Ida, hag Agata adarre ! Kulesza, Wanda.
Ur film sioul eo, kement a-fed lusk hag a-fed komzoù (n’eus ket kalz komzoù, kalz prantadoù didrouz a zo). Mareoù fromus a zo ha mareoù brav, barzhoniel kazi.

N’eus netra « dreistordinal » kenebeut met ur film brav eo.

Bon, a-hend all ez eo 3,50€ ar plasoù sine hiziv ha warc’hoazh c’hoazh (nevez amzer ar sinema) setu e soñj din e komzin c’hoazh eus filmoù amañ en devezhioù o tont. Kit d’ar sinema !

Ar film-tañva