Archive for the ‘Sport’ Category

Distro Gwengamp e Lig 1!

Posted: 30 Mae 2013 in Sport
Tikedennoù:, , , , ,

Dre ma ‘m eus bet tro da skrivañ ur pennad war an darvoud evit Ya e rankan ansav em eus bet diegi prientiñ unan all evit ar blog.
Setu neuze ar pennad, gant un nebeut skeudennoù ouzhpenn.

Ma oa sur Gwengamp da bignat e Lig 1 abaoe ar sizhun paseet hag an trec’h 1-0 a-enep ar Gazélec Ajaccio e Gueugnon, e oa deuet digwener ar mare da lidañ an darvoud war an ton bras er Roudourou. 9 bloaz war-lerc’h, ha goude bezañ bet tremenet dre an National, setu distro « ar beizanted » er rummad uhelañ !

Un nozvezh gouel a-feson ‘zo bet neuze evit lidañ an darvoud. Leun-tenn e oa ar stad (18208 arvester, rekord nevez !), ha miliadoù a dud a oa e kreiz-kêr dirak ur skramm divent. Goude ar c’hrogad en deus lakaet ar strollad Émile et images ar mor a dud da c’hortoz o tañsal ma arrufe ar c’hoarierien. Ha setu paotred an EAG o pignat war al leurenn evit dasparzhañ o levenez gant tout o fobl.


Skipailh Jocelyn Gourvennec (bet anvet gwellañ gourdoner Lig 2) a zo bet sirius betek penn, hag int-i da c’hounez 2-0 enep Dijon, gant palioù Atik (29′) ha Mandanne (52′). Peadra trugarekaat an arvesterien, ha laerez d’an Naonediz o eil plas er renkadur war ar marc’had ! A-boan c’hwitellet fin ar c’hrogad m’eo bet aloubet an dachenn gant an harperien, fier-ruz eus disoc’hoù o skipailh. Ur bloavezh mat e pep keñver eo bet hemañ evit Gwengamp, a echu gwellañ skipailh er gêr, ha gant 70 poent en holl. 20 match trec’h diwar 38 (10 rampo, 8 kollet), ha palioù plantet forzh pegement, evel a-enep Le Mans (6-1) pe Lens (7-0).


Ma oa gortozet skipailh Aodoù-an-Arvor ar bloaz-mañ evit ar pezh a sell eus kalite ar c’hoari, ne oant ket lakaet e-touez ar re gentañ evit ar bignadenn gant kalz tud. Hogen, ur strollad a zo bet ganet daou vloaz-zo e National, ha ne seblant ket paotred Bro-Dreger kaout c’hoant paouez mont war-raok asambles. Ur meskaj digredus eo deuet a-benn ar staff da sevel, etre c’hoarierien kozh met marnaonek c’hoazh evel ar c’habiten Lionel Mathis, pe Thibault Giresse, ha paotred yaouankoc’h ne oant ket gortozet d’al live-se. Giannelli Imbula, da skouer, a zo bet lakaet da wellañ c’hoarier Lig 2 daoust d’e 20 vloaz, ha kleuboù gwellañ Bro-Saoz a zo dedennet gantañ ! Ha petra lâret eus Mustapha Yatabaré, an argader chomet mut dirak ar pal warlene ? 23 fal ar bloaz-mañ, hag eñ gwellañ planter palioù ar c’hampionad !

Pal Gwengamp ‘benn bloaz a vo chom e Lig 1, ar pezh ne vo ket anat gant budjed izel ar c’hleub, dreist-holl ma ne teu ket a-benn da virout e c’hoarierien varrekañ. Betek-henn n’int morse diskennet en-dro raktal goude ur bigadenn, gant ma pado. Sapre krogadoù ‘vo er Roudourou ‘benn bloaz neuze, enep skipailhoù ‘vel ar PSG pe Monaco hag o « steredennoù » prenet a daolioù petrodollaroù. Krogadoù breizhek a vo ivez alies, enep Naoned, Roazhon pe An Oriant. Domaj eo ‘vije diskennet Brest, mod all ‘vije bet ur c’hard eus kampionad Lig 1 e Breizh !

Hogen, ne vo ket gwelet ken war an dachenn Arnaud Le Lan, unan eus c’hoarierien brudetañ ar vro. War-lerc’h kazi 400 krogad c’hoariet gant An Oriant, Roazhon ha Gwengamp en deus divizet paotr Ar Gemene ehanañ e remzad, hag eñ da verkañ ur pal disadorn enep ar PSG ‘vit e bartienn ziwezhañ ! Kenavo Arnaud !

Advertisements

Gwengamp – Lens (10/05/2013)

Posted: 13 Mae 2013 in Sport
Tikedennoù:, ,

Gwengamp 7 – 0 Lens

Ne oan ket bet kalz er Roudourou er bloavezhioù diwezhañ. Trede gwech ar bloaz-mañ, ha ne vo ket an hini diwezhañ sur ‘walc’h. Plijet oan bet gant Gwengamp – Naoned (2-1) ha dipitet bras gant Gwengamp – Clermont (0-0).
Dipitet e oan bet ivez da vezañ bet c’hwitet Gwengamp – Le Mans (6-1).
Distroet on da Wengamp (gant un toullad mignoned) dre m’emañ loc’het mat ar skipailh evit pignat er c’hentañ rummad. Trede e oant a-raok ar match. Hag anat deoc’h, n’on ket bet dipitet da vezañ bet graet an hent betek ar Roudourou digwener avat !

Ar gwellañ krogad bevet ganin en ur stad hag unan eus ma gwellañ eñvorennoù mell-droad (gant trec’h Gwengamp e Kip Frañs e 2009 pe c’hoazh Frañs 98 hag an Euro 2000) !

Dre chañs ‘vit Gwengamp e vanke d’an RCL un toullad c’hoarierien, ha paotred yaouank ha gant nebeut a skiant-prenet a zo bet neuze lakaet da c’hoari gant Eric Sikora. Gwelet eo bet buan kement-mañ, ken prim eo kroget an traoù, gant Gwengamp o wont war-raok ha Lens o kilañ. D’an eizhvet munutenn e oa graet an diaesañ : plantañ ar pal kentañ gant Yatabaré, gwellañ argader al L2 ar bloaz-mañ ha menneget evit priz ar c’hoarier gwellañ, a vo roet an dibenn sizhun o tont (Imbula, paotr Gwengamp ivez, a zo menneget asambles gantañ). An eil pal a zo deuet buan-tre, ul lob gant Yatabaré met kontet ‘vit an difenner ch’ti ‘benn ar fin, a zo bet an hini diwezhañ o touchañ ar vell. A-boan ur c’hard eur war-lec’h e voe plantet an trede, gant Mustapha « Yakamarquer » atav (24′), gant ur penn plaset mat. Ar pevare, un nebeut munutennoù goude (30’) a voe lakaet gant Mandanne : goude bezañ bet resevet gantañ ur pas propik gant Mathis e punas e denn mod Thierry Henry. Un hanter eur zo oa kroget ar bartienn, ha dija 4-0, propr. Hag an ola da gregiñ er Roudourou ! An dud a oa o huñvreal. 4-0 d’an troc’h : kentañ gwelet hervez ur paotr koumanantet dibaoe pell (da wiriekaat).

Mandanne ha Yatabaré, harozed an nozvezh (foto : © AFP Damien Meyer)
Ha sioulaat rafe ar Wengampiz goude an troc’h ? Ha gwelloc’h ‘vije an traoù gant paotred lañs ? Tamm ebet ! A-boan dek munutenn en eil hanterenn (55′) ha setu Mandanne o tennañ gounid eus fazi Rudy Riou (gward Lens) ha c’hoari gant an difennerien a-raok bountañ ar vell er roudeoù. Yatabaré a lakaas ur pevare pal (pe un trede ez-ofisiel, giz ho peus c’hoant) goude ur penn fin gant Diallo hag ur pas ken fin all gant Mandanne. 6-0 d’ar 73vet munutenn, ha daoust da Yatabaré kuitaat an dachenn dindan ar youc’hadennoù ne oa ket echu c’hoazh an abadenn. Ladislas « Kirikou » Douniama a lakaas ar seizhvet pal, servijet mat gant Mandanne adarre (85’) ha Gwengamp da gaout ur penalty. Tennet (fall) hag ehanet (mat) e voe gant Riou, en doa graet ur match kentoc’h mat. 9 pe 10 pal o dije gellet lakaat ar Wengampiz. Biskoazh kement all !

Diverradenn ar c’hrogad hag ar palioù e video

EA Guingamp (EAG) – RC Lens (RCL) Le résumé du… par Ligue2

Pebezh reuz er Roudourou, ha oa leun mat (15 000 a dud) ! Brudet eo ar stad ‘vit bezañ unan (hini) eus re dommañ Breizh met digwener eo bet burzhudus an traoù. Tomm-berv ar C’hop Ruz, met peurrest ar stad ivez. Sed aze ur videoig ‘vit kaout un tañva eus an aergelc’h bet digwener kostez Gwengamp. Nag ur blijadur bevañ mareadoù sport ‘vel-se !

Gant an disoc’h-se e kemer Gwengamp an eil plas da Naoned (da nebeutañ betek fenoz, hag ar c’hrogad Caen-Naoned). Partiet mat-tre eo paotred Jocelyn Gourvennec ‘vit pignat e Lig 1. Hervez disoc’h fenoz ne chomo marteze nemet tri foent da c’hounit.
Daou match a chom. Enep ar Gazélec Ajaccio (diwezhañ er renkadur ha diskennet dija e National ez-ofisiel) met e Gueugnon (pinijennet eo bet ar Gorsiz), hag er Roudourou en-dro enep Dijon, ‘vit an devezh diwezhañ. Mont rin di sañset, ha spi ‘m eus ‘m bo an digarez da aloubiñ an dachenn !

Aozañ ‘raio ar C’herne FG un tournamant e Lokorn d’ar sadorn 13 a viz Ebrel. Kontañ ‘raio hemañ ‘vit kampionad Breizh ar vell-droad gouezelek.

Aterset on bet dec’h gant Brieg eus Radio Kerne war ar sujed-mañ (trugarez vras dezhañ !) ha skignet eo bet an traoù bremaik war ar gwagennoù. Setu m’ho peus c’hoant d’am selaou displegañ an traoù, kit dre amañ (‘vit gellet pellgargañ fichennaoueg an atersadenn e stumm MP3).

Skipailh Kemper, gant e eil bloavezh, a zo enni un nebeut gourenerien eus skolioù Kemper, Mein Zao ha Kemperle (me^^).

Divizet hon eus neuze ober eus an devezh-mañ (ma vo niverus an arvesterien emichañs, c’hwi da skouer, neketa ? 😉 ) ur gouel, hag hini ar Gouren ivez.
An daou sport kelt-mañ (ar sport kentañ eo ar vell-droad gouezelek e Bro-Iwerzhon, dirak ar rugby zoken !), o deus muioc’h a berzhioù boutin evit ma c’haller raksoñjal : an aergelc’h, laouenek ha dichafoul, hag an doujañs ouzh an eneber, da skouer.

Pennaenn an devezh a vo an eskemm. Roet ‘vo an tu d’ar re o deus c’hoant dizoloiñ ar Gouren hag ar vell-droad gouezelek d’en ober. Ar c’hourenerien hag ar gourenerezed a c’hello ivez c’hoari mell-droad gouezelek (kemmesk eo ar sport, e Breizh da nebeutañ !) hag ur c’hrogadig a vo aozet etrezomp ma ‘z omp niverus a-walc’h. Abadennoù diskouez Gouren a vo ivez ‘pad an abardevezh (war ballenn, ha dindan ur barnom kenkaz ma vije glav). Evel-henn e vo tostaet en un doare pleustrek ar sportoù kenderv-mañ.

C’hwec’h krogad 2x15mn a yelo d’ober an tournamant mell-droad gouezhelek ofisiel, a grogo da 1e g.m., gant skipailhoù Kerne, Roazhon, Lifre ha Brest.
Ar c’hourenerien pe gourenerezed a fellfe dezho c’hoari mell-droad gouezelek (‘maez an tournamant evel-just) a zo pedet adalek 10e45. Ar vugale a vo degemeret mat ivez.


Titouroù pleustrek :

Degas dilhad ha botoù sport (ur re vasket, pe botoù gant krapoù m’ho peus).
Ur banerad boued a c’halloc’h prenañ war al lec’h, enni bara pok-ha-pok, chips, un aval, ur varrennad-edaj hag ur banne (5€).
Boued (bara pok-ha-pok, krampouz…) hag evaj a vo tu da gaout war al lec’h.
Trugarez d’hor c’helaouiñ m’emaoc’h en soñj dont ha/pe kemer paneradoù boued, deomp da aozañ mat an traoù.
Ma n’ho peus ket c’hoant c’hoari met arvestiñ ouzh ar c’hrogadoù hepken ez oc’h degemeret mat ivez evel-just.

Lec’h :
tachenn sport Lokorn (n’eus nemet unan, e-tal d’an archerdi mui pe vui).

Mont e darempred : hoel8[at]hotmail.com
Pajenn Facebook an darvoud : https://www.facebook.com/events/132539770269436
Lec’hienn ar C’herne FG : http://kerne-football-gaelique.com/
Titouroù a-zivout Skol Gouren Kemper

Gwengamp – Clermont

Posted: 8 Ebrel 2013 in Sport
Tikedennoù:, ,

Dre m’eo barrek Gwengamp er renkadur er mare-mañ ha dre ma ‘m boa netra ispisial d’ober disadorn, pe neuze mont da dredeogiñ ur genstrivadeg Gouren e Louargad (ha ne groge ket a-raok 4e g.m. an abadenn Gouren forzh penaos) e oa un digarez dreist da zistreiñ er Roudourou (match da 2e g.m.).

Digwener oa bet trec’het Naoned gant Angers (2-0). Rampo oa bet graet gant Monaco (1-1 enep Niort). Ma vije bet trec’h Gwengamp e vijent tremenet eil neuze, gant daou boent lañs war Naoned ha tri foent dale war Monaco, ar pezh a vije bet ur bravat taol evit klask pignat e Lig 1.

Mustafa Yatabaré n’eo ket bet gouest da gavout hent pal Clermont, na muioc’h e genc’hoarierien.

E-lec’h-se n’eo ket bet gouest ar Wengampiz da c’hounit, c’hwitet an taol. Met da nebeutañ int deuet a-benn da chom hep koll, ar pezh n’eo ket re fall dija gant ar match brein graet ganto. Spi ‘m eus n’o do ket da gaout keuz eus an nebeut poentoù kollet war an hent e fin ar bloaz.
Trede emaint neuze bremañ (a-raok ar c’hrogad etre An Havr Nevez ha Caen fenoz), rampo gant Naoned (lakaet dirazo ‘blam d’an diforc’h palioù) ha pemp poent ‘drek Monaco.

Ur gwir c’hwitadenn eo bet ar c’hrogad avat, hag un dipit bras evit an arvesterien, a c’hortoze kalz eus c’hoarierien Aodoù an Arvor a-raok an taol-kas (re sur’walc’h), me en o zouezh.
N’eo ket bet re re fall an difennerien dre vras, war-bouez Camara, kollet penn da benn war e du kleiz. Burzhudus eo bet Samassa, gward Gwengamp, savetaet gantañ meur a vell pal, ha poent ar rampo.
E kreiz an dachenn eo bet dipitus-tre Imbula, kentoc’h mat-tre boas : klasket en deus pemp troad d’ar maout e plas c’hoari simpl, ha kollet alies ar vell.
An argaderien zo bet nul da vat, dreist-holl Yatabaré ha Mandanne, pep hini o c’hoari evitañ e-unan hep sevel ar penn e mod ebet da welet ma oa posubl ober ur pas. Ur mare-zo n’dije gellet, pe zoken ranket Yatabaré ober ur pas da v/Mandanne, ha kazi sûr ‘vije bet ur pal da heul. 😦

Dre vras e vanke kalz traoù da Wengamp ‘vit kaout an tri foent, kalz re. Kalz pasoù c’hwitet, diaesterioù da vont war-raok ha da fiñval war an dachenn hag ur gudenn tagusted : ne bigne ket buan a-walc’h ar Wengampiz war baotred Clermont p’o doa ar vell met o lezel da vont gant ar vell betek re.
Dav eo ansav ivez ez eus bet graet ur match ouzhpenn sirius gant Clermont. Tost eo bet paotred an Arvern da bakout an tri foent.

Diaes din bezañ laouen gant seurt disoc’h met ma c’heller gwelet ar werennad hanter c’houllo (daou boent kollet) e c’haller ivez gwelet anezhi hanter leun (ur poent ouzhpenn). N’eus nemet war lec’h an devezhiad diwezhañ e vo tu ober ar bilañs da vat. Seizh krogad a chom evit pignat e Lig 1, bec’h dezhi !
Hag e keñver skipailhoù all Breizh n’eo ket re fall ar rampo. Trec’het eo bet Naoned ha Roazhon 2-0 ha feskennadoù zo bet tapet gant Brest (4-0 enep Bastia) hag An Oriant (5-0 enep Lille). Dibenn-sizhun fall ‘vit ar foot breizhat avat !

Disadorn, da geñver nozvezh ar St-Padrig hag ar c’hrogad Lig 1 An Oriant – Brest ez eus bet roet an dro da skipailhoù mell-droad gouezelek An Oriant ha Brest c’hoari ur c’hrogadig dispakañ er Voustoer, a-raok match ar c’hoarierien a-vicher.

Evel ma ne ouzoc’h ket sur-walc’h, e c’hoarian mell-droad gouezelek e skipailh Kerne (Kemper-Lokorn) dibaoe ar bloaz-mañ met un nebeut Kemperiz, me en o zouez neuze, ‘zo bet pedet gant Brest (trugarez vras dezho !) a-benn klokaat o skipailh.

Ur blijadur bugel ‘vidon c’hoari en ur stad bras (met kazi goullo siwazh, re abred ma oamp bet programet) ha dizoloiñ eus a dost-tre geotenn sintetek brudet ar Voustoer (ar stad kentañ e Frañs gant seurt leton ma ne fazian ket). Un nebeut c’hoarierien a zo bet o arvestiñ ouzhomp ur mare, ha ni da c’hoari dirak daoulagad Audard pe c’hoazh Giuly !

Ne oa Brestad ebet laouen da vont gward ha damc’hloazet on er mare-mañ setu e oan laouen da vont er palioù (kreiz an dachenn vezan boas). Evit un taol-esae n’eo ket bet re fall. Ne ‘m eus kemeret nemet daou bal ha ne c’hallen ket ober kalz tra ouzhpenn.

Buan ha buan, reolennoù pennañ ar vell-droad gouezelek, evit ar re a vije dedennet (tremenit ar rannbennad-mañ mod all).
War un dachenn foot (pe dost), 11 c’hoarier e pep skipailh (15 e Bro-Iwerzhon).
‘Vit ur c’hrogad gwir ‘vez graet div hanterenn 35mn sañset, met alies e reer tournamantoù, gant meur a grogad berroc’h neuze (2×10 pe 2×15).
Ar vell a c’hell bezañ c’hoariet gant an troad koulz ha gant an daouarn.
M’emañ ar vell war al leur, n’haller ket kemer anezhi gant an daouarn. Dav eo ober ur “pick up” da lâret eo lakaat anezhi da zibradañ gant an troad, a-raok kenderc’hel gant an daouarn.
Ar pasoù a vez graet gant an troad, pe gant an dorn o skeiñ er vell ha n’eo ket o vannañ anezhi.
Difennet eo redek muioc’h ‘vit 4 eilenn gant ar vell. D’ar mare-se eo dav ober ur pas, pe un dribl gant an dorn (‘giz er vell-dorn pe er vell-baner), pe c’hoazh ur solo (touchañ anezhi gant an troad) ur wech an amzer, hag a bep eil.
Dav eo klask lakaat ur pal (3 foent) pe neuze tennañ dreist d’ar pal etre ar peulioù (1 poent).
Difennet groñs eo an takloù hag ar plakoù. ‘Vit adtapatout ar vell e c’haller skeiñ warni gant an dorn p’emañ e daouarn egile, pe klask daspakañ pasoù ar skipailh all. Ar skoaz ouzh skoaz, zoken rust a-walc’h, a zo aotreet.

Ma ‘z oc’h dedennet, ha deoc’h da gaout ur vennozh d’eus pezh c’hall bezañ ar sport dianav-se, ar match a-bezh a zo bet filmet hag a zo roet da welet war Internet. Daou filmig a zo, unan dre lodenn (amañ-dindan).

N’eo ket bet dreist ar match a-fed kalite c’hoari (kalz bolotennoù kollet ha fazioù dorn) met engouestl a zo bet gant peb a skipailh hag a-benn ar fin eo bet trec’h Brest 4-2 / 2-4 da lâret eo 14-10 (4 fal ha 2 « 1 poent » enep 2 bal ha 4 « 1 poent »).

‘Vel ma ‘m eus bet tro da lâret d’ar Vrestiz a c’hoarie ganeomp, da nebeutañ e vo bet gounezet ur c’hrogad gant Brest an noz-mañ.

Ya, rak da heul e oa neuze ar match mell-droad Lig 1 etre an FC An Oriant ha Stad Brest.
Sur e oan e vije bet trec’h An Oriant met n’em bije ket kredet e vije bet dastummet ur roustad a seurt gant Brest memestra. Ur blijadur ‘vidon, skoazeller Gwengamp ma’z on, ha plijet gant ar c’hoari brav, ‘vel hini an Oriant (c’hoari bravañ Lig 1 sur ‘walc’h, gant St-Etienne marteze…) arvestiñ ouzh seurt krogad.
Pal kentañ goude 3 munutenn, eil goude 8 munutenn, graet ar jeu dija, ha 4-0 ‘vit ar Verluzed e fin ar gont. 5 pe 6 o dije gellet lakaat aes…
Dreist-holl, ouzhpenn ar skor, eo kentoc’h an doare a ra aon din evit dazont Brest. N’eus bet c’hoari ebet kinniget ganto, n’o deus ket bet an dro da reiñ aon da zifenn An Oriant. A boan m’en deus touchet Audard (gward An Oriant) ar vell : un duvell gounezet enep Licka ha melloù tapet war an tennoù a-gorn traken. N’eus bet netra mat ‘kostez Brest ar wech-mañ, un tamm c’hoant ober mat marteze, ha c’hoazh…
Nozvezh dreist ‘vit an tredeog, nebeut-tre a fazioù hag ur c’hartoñs melen hepken, e fin ar c’hrogad.
Pulluc’het eo bet ar Vrestiz propr ha naet, netra da lâret.

Ma kendalc’h paotred Brest gant seurt (nann)c’hoari ne welan ket re penaos c’hallfent chom er c’hentañ rummad, pe neuze vije gwashoc’h ar re all…
Klevet ‘m eus tud o lâret o doa al live Lig 2 met n’on ket a-du tre. Skipailhoù Lig 2-zo a c’hoari kalz gwelloc’h, Gwengamp da skouer. ^^
Ma, penaos ‘vo graet gant Gwengamp ‘vit gounid enep Brest ‘benn bloaz ma tiskenn ar Vrestiz ?! Ni ra ur striv ‘vit pignat, grit unan ‘vit chom er c’hentañ rummad noñdedie !

Kentoc’h sioul eo ar Voustoer peurliesañ, keñver ar Roudourou pe Francis Le Blé da skouer, met gwir eo eo bet trouzus a-walc’h an arvesterien disadorn. N’eo ket bemdez ma vez friket an amezeg en un derby. N’eo ket bet displijus an troioù « ola » hag ar goaperezh ouzh ar Vrestiz e fin ar c’hrogad me lâr deoc’h !

Un diverrañ video d’eus ar c’hrogad gant ar palioù a c’heller gwelet war lec’hienn Ar Skipailh, dre amañ.

Plijus a nozvezh mell-droad eta !

Plijout ‘ra din kalz ar vell-droad, da c’hoari pe da arvestiñ, met anzav a ran ne yan ket alies d’ar stad.
Gounezet ‘m eus ur plas ‘vit mont da welet An Oriant – Evian (trugarez Mammig ! 😉 ). Kinniget ‘zo bet din gant mignoned ar vell-droad gouezelek mont da welet Gwengamp – Naoned, ha me da lâret ya diouzhtu (Gwengamp eo ar skipailh tost d’am c’halon), a-raok merzout e oa an daou grogad da vezañ an hevelep devezh. Ne vern, da 2e g.m. e oa match Gwengamp, ha da 8e noz hini An Oriant. Bezomp foll, deomp d’an daou neuze !

Foto : DR

Gwengamp 2 – 1 Naoned

Pell-zo ne oan ket bet d’ar Roudourou da welet ur c’hrogad. Dibabet mat ‘ma match ‘m eus graet. Sapre partienn ! M’ho peus adkavet ur vouezh o straniñ e Gwengamp, ma hini eo, kollet ‘m eus anezhi eno disadorn. ^^

Kentañ hanterenn Gwengamp ‘zo bet nul da vat, kazi mezhus memes. C’hoant ebet ganto, maez-sujed da vat. Ouzhpenn-se n’haller ket lâret e c’hoarie mat an Naonediz zoken. C’hoari a raent, setu tout, ar pezh ‘n deus ankouezet ober Gwengamp. Kollet-mik ‘seblante bezañ ar c’hoarierien. Ha deuet eo a-benn Samassa, gward Gwengamp, da lakaat en e bal ur vell a vije aet er-maez mod all… 0-1 neuze.


O fegement o deus paket paotred an EAG gant Gourvennec ‘pad an troc’h kredapl, rak cheñchet krenn o deus o emzalc’h adalek an distro. Hag int da gregiñ da c’hoari brav, da lakaat ar gwask war an Naonediz ha da vezañ tagnous war pep kement mell a zo (ar pezh n’o doa ket graet tamm ebet betek-henn). Ha Kirikou da zont-tre war an dachenn (Ladislas Douniama e anv gwir, met e lesanv a gomprener aes pa ouzer n’eo ket bras an den hag e red kalz ha buan ^^.) Mat-kenañ eo bet ha gantañ eo bet graet an div gasadenn o deus degaset ar palioù. Ur c’hreiz kentañ evit penn Fauré, deuet-tre div vunutenn a-raok (e 100vet pal e Lig 2) hag un eil da heul, gant Yatabaré o splujañ da lakaat gant e benn ar vell e foñs pal Naoned. 2-1. Dirollet ar Roudourou, a oa kazi leun-chouk. Profitet ‘m eus 100%, o vezañ ma oan e tribunell ar C’hornôg ouzhpenn-se, gant tud ar C’hop Ruz. 🙂
‘Mañ ket pell al Lig 1 ken, war-raok Gwengamp !

(A-hent all, goût ‘ran ‘walc’h ez eus kalz harperien Naoned simpa met un toullad d’eus ar re deuet betek Gwengamp disadorn a oa amboubaled vrein. Klasket o deus cheu forzh pegement e kêr a-raok ar c’hrogad, un nebeut Gwengampiz o vezañ skoet gante, ha devet o deus skerboù ruz ha du. Tro-spered mezhus !)

An Oriant 2 – 1 Evian

Daoust din bezañ evit Gwengamp eo ar Voustoer ar stad m’on bet an aliesañ da welet krogadoù ennañ (o chom e Kemperle on bet ‘pad pell).
Kentañ hanterenn ar Verluzed ‘zo bet eus ar c’hentañ ‘keñver c’hoari. Heuliadennoù brav, mestroni hollel : kredet ‘vije bet gwelet c’hoari ar Barça enep da Getafe pe Valladolid, pe dost. ^^ Evian ‘zo chomet o tifenn, gant an unnek c’hoarier en o lodenn, hep ober netra pe dost (un tenn a-gorn) nemet redek war-lec’h ar vell. N’eus manket nemet un dra : palioù. Ranket o dije paotred an Oriant plantañ daou pe dri da vihanañ. Unan en deus lakaet Aliadière, ha c’hoazh, war ur penalty na oa ket anat da c’hwitellat.

Foto : DR

Un eil o deus lakaet neuze (78′), gant Monnet-Paquet (brav gwelet ar paotr-se o c’hoari). Adal neuze ‘zo bet merzet ur cheñchamant splann. Diskennet eo kalz ar Verluzed war an dachenn, da glask difenn o lañs, ha n’eo ket bet pell Evian ‘vit plantañ unan d’e dro (83’). Aon o deus bet neuze paotred an Oriant betek ar fin. N’eo ket cheñchet ar gont, dre chañs, ha trec’h ar re orañjez neuze (2-1), met dav ‘vije dezho deskiñ « lazhañ ar matchoù » abretoc’h p’o deus an dro d’en ober, kuit da chom hep strafuilhañ er munutennoù diwezhañ.

Laouen on bet ivez o welet e oa un tamm brezhoneg er Voustoer. War an traoù kartoñs roet da bep hini evit ober trouz, da skouer, e oa tu da lenn, war ur foñs mod banniel Breizh (ne oa ket gwenn ha du met orañjez ha du),  “Emañ an Oriant aze !”, skrivet e bras, hag e bihan dindan “Ici c’est Lorient !”. N’on ket sur e vije peurvat an droidigezh met n’eo ket fall dija ‘vije gwelet traoù skrivet e brezhoneg e lec’hioù ma vez miliadoù a dud ingal.

Ur sadornvezh mell-droad eus ar c’hentañ am eus bevet neuze, en deus roet din c’hoant distreiñ d’ar stad a-raok pell, dreist-holl ma kendalc’h Gwengamp gant e daolioù-kaer. 🙂

Gourfennoù Open Tennis Kemper 2013

Posted: 18 C'hwevrer 2013 in Sport
Tikedennoù:,

Evel prometet, ur gerig war gourfennoù Open Tennis Kemper on bet da welet dec’h goude merenn.

Da gentañ, c’hwitet mat ma fronostikoù ganin.
Biskoazh ne’m bije kredet vije aet ken pell ar Breizhad Marc Gicquel, a zo bet trec’h war Bautista-Agut (niverenn 1 an tournamant) e ¼ ha Steve Darcis (niverenn 3) e ½. Bravat tournamant pa ouezer ez eo paotr Sant-Brieg 35 bloaz dija !
Enep-tañ er gourfenn, Marius Copil, ur Rouman dianav din a-raok an tournamant. Trec’het en deus Gilles Muller ha Dudi Sela da vont ken pell memestra !

Foto : An Telegram

Leun-chouk e oa ar sal, entanet an dud, prest da reiñ nerzh d’ar Breizhad. Hogen, ‘vit lâret gwir, n’eo ket bet plijus-tre ar c’hrogad da welet abalamour da (nann-)c’hoari Copil. Ur paotr sonn eo ar Rouman, 1m93, 86kg. Servijet en deus ‘pad tout ar match evel un Isner pe ur Roddick (ouzhpenn 20 “aces”, 90% a boentoù gounezet war e servij kentañ !) : dibosubl da c’hoari ‘vit ar paour-kaezh Gicquel.

Klasket en deus ar Breizhad koulskoude, ha darbet eo bet dezhañ gounit ar set kentañ en tie-break, kollet justik ‘benn ar fin : 7-6(9).
En eil set en deus kendalc’het « ramz ar C’harpatoù » da servijout ‘vel ur robot, ha da c’hoari fin un nebeut poentoù. Digudenn eo bet ‘vitañ : 6-4

Dipitet-tre e oa Gicquel, c’hoant bras gantañ gounez e Kemper ‘vel-just. Ha muioc’h c’hoazh pa ouezer n’emañ ket sur distreiñ abalamour d’e oad, hag e oa atav bet trec’h war Copil betek-henn (2 bartienn gounezet war 2).

Foto : DR

‘Benn ar fin, ‘vit gwelet gwir tennis (eskemmoù gant ar volotenn petra !) e oa gwell erruout abred hag arvestiñ ouzh gourfenn an doubl, etre Jamie Delgado & Ken Skupski (Breizh-Veur) d’eus un tu ha Raven Klaasen (Suafrika) & Johan Brunström (Sveden) d’eus an tu all. Souezhadenn ebet en daolenn avat ar wech-mañ, an doubloù unan ha daou o ‘n em gavout asambles er gourfenn. Start eo bet ar match, ha sapre eskemmoù ‘zo bet. Benn ar fin eo bet trec’h Klaasen ha Brunström war ar Saozon : 3-6 / 6-2 / 10-3.

Laouen on bet o arvestiñ ouzh ar c’hrogadoù am eus bet tro da welet  ar sizhun-mañ ha mall ‘zo warnon distreiñ da Greac’h Gwenn ar bloaz o tont !