Archive for the ‘Sonadegoù’ Category

Un nozvezh hip-hop a oa disadorn tremenet er Run ar Puñs (sal sonerezh a-vremañ plijus-tre, e Kastellin).


An arzour kentañ, Hippocampe fou, a zo ur rapour gall yaouank. E skridoù a zo peurliesañ testennoù leun a fent, graet evit plijadur an divskouarn muioc’h eget evit diskuliañ kudennoù-zo pe reiñ e ali war ar bed. Met ouzhpenn bezañ farsus (da skouer, H&M, un ton war ar poanioù revr : gwazrudez ha mikoz !) eo skrivet mat-tre ar pozioù (kalz klotennoù hag heñvelsoniadoù), ha dreist-holl, rapet int mat-kenañ.

War al leurenn e oa an noz-mañ gant ur c’homper MC (Céo) hag un DJ.
A-raok ar sonadeg em boa bet tro da glevet tonioù-zo un tamm dre zegouezh war Internet (Le dindon de la farce, Chez moi y a un lama) met ne anavezen ket Hippocampe fou muioc’h evit-se.

Souezhet on bet neuze o welet/klevet e oa er sal gwir « fans », gouest da rapiñ kement pozioù a oa (ha koulskoude n’eo ket gwall aes, ken prim e ya alies).
Evel ur pesk en dour mouarf e santer Hippocampe fou war al leurenn. Estreget rapiñ mat-tre ha gant ur flow efedus a ra. Ur sort abadenn « stand up » eo ivez e sonadeg a-wechoù, dre ma lak kalz an dud ba’r jeu, betek o lakaat da gemer perzh da vat.

Kuitaet ‘m eus ar sal gant ar bladenn « Aquatrip » dediet. 🙂

 

Da heul, goude un troc’hig evit cheñch al leurenn evañ ur banne bier ha mont da stotañ, e oa tro ar strollad amerikan The Procussions.

Paotred ar C’holorado o deus kroget da seniñ e 1998. Div bladenn o deus graet, e 2003 ha 2006, a-raok en em zispartiañ e 2008, echu ar jeu. ‘Benn ar fin o deus divizet daou MC, Jason Medeiros ha Brian Roberson, adkregiñ ganti hep ar re all, e 2011. Dibaoe e reont sonadegoù er bed a-bezh, hag ur bladenn all a zo bet embannet e 2013.

N’int ket dre ret hollvrudet met un dalvoudegezh sur en hip-hop US eo The Procussions. Ha ma anavezoc’h Hocus Pocus (strollad all 20Syl, paotr C2C) ho peus o c’hlevet dija marteze, war an tonioù (dreist) anvet Vocab pe c’hoazh Hip hop ?.

Startijenn forzh pegement a zo gant an daou MC war al leurenn : rapiñ prim, dañsal ha lammat pep lec’h a reont. Brian Roberson a zo ivez barrek-kenañ ouzh an taboulinoù. Un DJ yaouank met efedus a oa ganto war al leurenn. Seurt hip-hop a ro c’hoant da fiñval forzh pegement. Dre chañs e oamp war-sav, dibosupl a-grenn ‘vefe bet din selaou se gant ma revr war ur gador !

 

Sapre strolladoù ha sapre nozvezh ! Pebezh plijadur ! Bevet an hip-hop hag ar Run ar puñs !

Advertisements

IAM er C’harène (13/02/2014)

Posted: 17 C'hwevrer 2014 in Sonadegoù
Tikedennoù:, , ,

Dimerc’her tremenet e oan e Brest evit gwelet IAM war leurenn ar C’harène.
Dibaoe ma bloavezhioù skolaj e plij din kalz crew Masilia, unan eus ar strolladoù rap koshañ (1989) hag anavezetañ er c’hwec’hkorn (gant NTM).
« Nés sous la même étoile » a zo unan eus an tonioù kentañ am eus bet ar blijadur da rapiñ dre eñvor (gant tonioù-zo gant MC Solaar, 113, Fonky Family, Sniper, Wallen pe c’hoazh Rohff).
Pa ‘m eus desket e oant o vont da baouez a-benn nebeut hag e tremenent ba’r vro em eus tapet ma flas kerkent.

Ar sonadeg (div eurvezh bennak) a zo bet dreist. Un ton nevez evit dihuniñ an dud ha reiñ amzer d’ar re a oa c’hoazh o stotañ pe o lipat ur bier da erruout, ha setu an traoù sirius da gregiñ da vat gant an ton « L’école du micro d’argent ». Gant div bladenn deuet ‘maez nevez-zo (« Arts martiens » e miz Ebrel 2013 hag « … IAM » e miz Du 2013), e oa tu da soñjal e vije nebeutoc’h a blas evit an tonioù koshoc’h (pell da vezañ kozh tonioù !). A-benn ar fin eo bet dreist ar c’hempouezh kavet gant ar strollad etre an tonioù nevez hag ar re goshoc’h, re ar bladenn « L’école du micro d’argent » evit an darn vrasañ. 9 ton diwar ar 15 a ya d’ober gwellañ pladenn ar strollad a zo bet klevet an deiz all !


Ma oa un digempouezig dimerc’her, e oa kentoc’h etre an daouad Akhenaton ha Shurik’n ha peurrest ar strollad, kalz siouloc’h. N’eo ket bet klevet kalz Kephren ha ne vez ket gwelet kement an DJ-ed, Kheops hag Imhotep, kuzhet a-dreñv o ardivinkoù). Shurik’n a oa dirollet ha sonet en deus ivez daou don solo dezhañ (« Samuraï » ha « Fugitif »). Ouzhpenn rapiñ mat a rae an daou MC. Implijet o deus mat-tre al leurenn hag ur gwir c’hoari aktourien a zo ganto, pe zoken etrezo, evel war « Sombres manoeuvres » da skouer (kanaouenn leurenniet brav, evel ma vijent o respont an eil d’egile e-kerzh ur GAV).

 

Gant re an adgalv, a zo bet eus ar c’hentañ troc’h (« Je danse le Mia », « Petit frère », « Dernier coup d’éclat ») an ton gwellañ a zo bet « Demain c’est loin », dek munutenn rap a-feson gant ur Shurik’n tomm-berv, dek munutenn eürusted.

Ma plij deoc’h IAM ha n’ho peus ket bet tro d’o gwelet c’hoazh, grit eveldon, n’ho po ket keuz !
Daoust dezho tostaat eus o hanter-kant vloaz e chom yaouank hag efedus c’hoazh paotred IAM.

Da gaout un tañva mat, setu ur sonadeg all, gant ur set damheñvel ouzh hini Brest.

Dibaoe bloavezhioù e plij din kalz Oxmo Puccino ha selaou ouzh unan eus e bladennoù ur wech an amzer. Pa ‘m eus gwelet e oa da zont da Vrest ‘m eus tapet ma flas raktal.
Mat ‘m eus graet rak dreist e oa sonadeg Oxmo met dizoloet ‘m eus ivez ur strollad dreist a rae al lodenn gentañ : Cabadzi. Krogomp ganto neuze.

4 den a bign war al leurenn, 4 den « normal », ha n’o deus ket tamm ebet liv ar rap war o dilhad. Ur rapour/kaner, ur plac’h gant he gourebed hag o kanañ flour ivez, ur beatmaker barrek gant an MPC ha barrekoc’h c’hoazh war an human beat box (ha gouest da seniñ gant an ukulele ivez!), hag ul liessoner gitar/trompilh/tuba…
Plijet en deus din diouzhtu o sort hip-hop hiron ha dibar. Ar sonerezh ‘m eus kavet dreist hag ar pozioù dedennus-tre. Ouzhpenn-se e kasont un dra bennak da vat war al leurenn, un dra kreñv a-walc’h (ar c’hroc’hen gwazi o deus roet din war tonioù-zo). Aliañ a ran deoc’h groñs dizoloiñ ar strollad hag o albomoù (daou evit poent). Sed aze dija un nebeut tonioù, da gaout un tañva.

N’eo ket tout, met evit gwelet Oxmo Puccino e oan deuet memestra.

Oxmo a zo un den a gont e bed ar rap e galleg. Kroget eo da rapiñ e penn-kentañ ar bloavezhioù 1990 met an ton en deus roet brud dezhañ, Mama Lova, gant DJ Kheops, a zo eus 1998.


C’hwec’h albom a zo, holl mat-kenañ, e lec’h ma rap Oxmo war a bep seurt sujedoù. N’eo ket eñ paotr ar gerioù gros hag ar feulster : tra’bet da welet gant ar gangsta rap. An testennoù a zo barzhoniel-tre, ha dous a-walc’h peurliesañ, war traoù ar vuhez dreist-holl. Plikout a ra dezhañ kalz ar sonerezh gall hengouneloc’h ha lesanvet eo bet le « Black Jacques Brel ».
Ar sonerezh a zo dous ivez, liv an jazz warni alies.

N’on ket bet dipitet tamm ebet gant ar sonadeg. Dreist e oa Oxmo, a vez santet laouen-tre d’eus ar pezh en deus ar chañs d’ober ha fier d’eus e arvesterien. Tro-dro dezhañ, sonerien eus ar re varrekañ ouzh ar piano, ar gitar, ar gitar-boud, an taboulinoù…

Evel-just, pa krog un arzour da gaout un toullad kanaouennoù, ne c’hall ket ober an holl dindan ur sonadeg, setu on bet dipitet un disterig da vezañ chomet hep klevet tonioù-zo a blij din kalz, evel Mama Lova pe La danse couchée.

An tonioù en deus kanet a zeue d’eus an holl albomoù.
Un nebeut tonioù d’eus ar re gentañ, Opéra Puccino (1998), gant L’enfant seul da skouer, pe d’eus L’amour est mort (2001), gant J’ai mal au mic da skouer, betek an hini diwezhañ.

Tonioù ma fladenn karetañ (L’arme de Paix, 2009) a oa ivez, evel Soleil du nord pe 365 jours.

Kalz tonioù kanet digwener paseet a oa tennet d’eus ar bladenn diwezhañ, Roi sans carosse (2012), pladenn en deus roet an tu da Oxmo da c’hounez ur « Victoire de la musique » ar bloaz-mañ, hini ar rummad « musiques urbaines » (ya, iskis, diaes eo da dud zo lâret ar gêr rap sur ‘walc’h). Tonioù evel Le sucre pimenté, lec’h m’eo bet lakaet an holl da gemer perzh, pe c’hoazh Pam-Pa-Nam.

An adgalv kentañ a zo bet hirik, gwell a se, gant nebeut tonioù evel L’enfant seul da skouer. Un eil adgalv omp deuet a-benn da gaout hag echuet eo brav ar sonadeg war Le cactus de Sibérie.

Ma plij deoc’h Oxmo, kit da welet anezhañ, talvezout a ra ar boan, sur !

Eil bloavezh m’emaon o chom e Kemper, hag eil bloavezh e yan d’ur sonadeg da vare gouel an Hivernautes.
E ya, profitañ ‘ran, evit ur wech ma c’hoarvezh un dra bennak er gêr-mañ ha n’eo graet na ‘vit an trede oad na ‘vit ar vourc’hizien. Ijinit-ta, gwelet ‘zo bet tud er straedoù goude 11e noz ! Gnark gnark. ^^

Warlene ‘m boa bet ar chañs da zizoloiñ traoù dreist evel Le Cercle pe Krismenn (kaoz rin diouto amañ a-raok pell d’am soñj). Ar wech-mañ n’am eus gallet mont nemet da nozvezh an hip-hop (c’hwitet hini an elektro siwazh, ha ne vefen ket bet da hini ar metal).

4 strollad hip-hop/rap a zo bet klevet en Tog Ruz diriaou paseet neuze, evit unan eus ar sonadegoù diwezhañ el lec’h-mañ, a zeuio a-benn nebeut da vezañ ur greizenn kendalc’hoù.

En urzh tremen : Clara Kurtis, Micronologie, Casey ha Dope D.O.D.

Kemperiz eo paotred Clara Kurtis (plac’h ebet er strollad daoust d’an anv), strollad bet ganet e 2010. N’am eus ket o gwelet en Tog Ruz dre ma ‘m boa graet dija miz zo bennak e Kastellin. A-hervezh un den en deus klevet an div sonadeg e oa gwelloc’h hini ar Run ar Puñs ouzhpenn-se, setu n’am eus ket c’hwitet kalz tra.
Plijus da glevet eo ar pezh a reont, ur seurt hip-hop nerzhus a-walc’h, gant binviji gwir war al leurenn. Plijout ‘ra din ar sonerezh met n’on ket bet kendrec’het gant ar pozioù ha gant ar c’han.

 

Da heul e sone ar strollad Micronologie, Roazhoniz ar wech-mañ.
Pellik-zo o anavezan, a-drugarez d’an ton o deus graet gant ar strollad trad/ska gallaoueg IMG, « Rap tour » (da selaou amañ). Ur bladenn gentañ, (ket fall hag anvet « Micronologie ») o deus graet e 2005 (dija !), hag un eil, simpa-tre, « Art, Rythme, Éthique », e 2009. Gounezet o deus « taol-lañs an Erer Yaouank » e 2008, ar pezh n’eo ket netra ! Ar chañs am boa bet da gaozeal un tamm ganto e tavarn VIP an Erer Kozh ar bloavezh war-lec’h (roet o doa din ur vaketenn), ha gellet am eus en ober en dro diriaou, goude o sonadeg. Paotred simpa anezho ouzhpenn.
Un DJ ha 3 MC a zo. Troet int war du ar sonioù jazzy ha funky dreist-holl. Barrek eo ar rapourien (K.Oni, Safirius ha Casta), ur flow efedus gante o zri, ha santet ‘vez mat eo ur blijadur ‘vito c’hoari gant ar yezh da lakaat anezhi da seniñ brav, klotennoù hag all. DJ Sambal (bet ‘pad bloavezhioù o seniñ en ur bagad kostez Roazhon !) a zo barrek ivez. Nerzhus hag efedus int o fevar war al leurenn muioc’h c’hoazh ‘vit war ar pladennoù.
Er set kinniget diriaou e oa un toullad tonioù anavezet ganin, hag un nebeut re nevez. Un trede pladenn a vo o tont a-benn nebeut sañset, yeah.

 

 

Casey a oa da heul, ur rapourez engouestlet a blij din a-walc’h.

N’on ket sot gant ar sonerezh met ar pozioù, don ha speredek, a blij din kalz. He unan e oa war al leurenn gant un DJ.
Kregiñ ‘ra da vezañ anavezet un tamm, e bed ar rap da nebeutañ, hag un trede pladenn a zo raktreset evit ar bloaz-mañ. Kanañ a ra war a bep seurt sujedoù, hogen a orin eus ar Martinik eo Casey ha prederiet kalz eo gant ar vorianegezh (négritude), istor ar sklavelezh…

He zub a zo « Apprends à t’taire » ‘lec’h ma ra goap d’eus ar rapourien n’o deus netra da lâret hag a ra fazioù yezh ouzhpenn-se…
« Quoi ? Chez toi, y a pas l’dictionnaire ? Alors apprends à écrire s’te plaît ou apprends à t’taire. »

Farsus un tamm met n’eo ket ma zon karetañ ganti pell ac’hann. Un toullad kanaouennoù mat a zo met Un sac de sucre pe Chez moi a blij din kalz.

 

 

 

Evit klozañ ganti e oa ar strollad Izel-vroad Dope D.O.D., hag a grog da vezañ anavezet mat gant ar grennarded a blij dezho ar rap. N’eo ket re ma zasad te met ‘benn ar fin on bet plijet a-walc’h ouzh o gwelet. Un hip-hop trouzus ha nerzhus eo, gant tonioù boud kreñv. Liv ar metal a zo war ar ganerien (o tiskouez o biz-brasañ ‘pad ar sonadeg pa n’emaint ket o evañ scotch pe o butuniñ) hag un tammig war ar sonerezh. E saozneg eo ar pozioù met ansav a ran n’on ket bet da welet a dost d’eus petra oa kaoz.

Kudenn : kredet n’ deus unan eus ar rapourien pignat war al leurenn gant ur roched d’eus ar Stade Brestois, fazi bras ! Ne oan ket ma unan o huchal « Gwengamp Gwengamp » d’ar mare-se. ^^


Ur pennad war ur sonadeg all a vo da zont buan…

Rocé er Run ar Puñs (14/02/2013)

Posted: 20 C'hwevrer 2013 in Sonadegoù
Tikedennoù:, ,

Plijout ‘ra din kalz ar rapour Rocé, dibaoe un nebeut bloavezhioù bremañ, setu on bet souezhet bras, ha war an tu mat, pa ‘m eus gouezet e vije da dremen e Kastellin.
Komz a rin deoc’h en-dro amañ eus e bladennoù a-raok pell (unan nevez a vo fin miz Meurzh eta).

Ur rapour speredek evel ma n’eus ket kalz eo eñ (lesanvet eo bet « le rappeur philosophe »). Pep ton a ginnig pozioù labouret-kenañ ha gant ur preder don peurliesañ.
Ganet eo Rocé (José Kaminsky e anv gwir) e Aljeria e 1977 a-raok dont da Frañs bugel. E dad a zo ur rezistant brudet, Adolfo Kaminsky, hag e c’hoar, Sarah Kaminsky, aktourez ha skrivagnerez. Kompren a reer neuze un tamm gwelloc’h a belec’h e teu tro-spered hag engouestl ar paotr.

Er Run ar Puñs e oa an abadenn, ur sal e Kastellin deuet da vezañ en un nebeut mizioù ma lec’h karetañ ‘vit ar sonadegoù (ur pennad a rin sur’walc’h a-benn nebeut traken war al lec’h).

Iskis an deiziad (d’ur yaou da 8e30) hag ar priz (digoust). Gwashoc’h, dizoloet ‘m eus war al lec’h ne vije ket posubl tapout ur banne bier. Petra, « soirée sans alcool » ? ^^
‘Benn ar fin em eus komprenet e oa liammet tout-se gant ar memes abeg. Donedigezh Rocé e Kastellin a oa liammet gant ur raktres pedagogel, a-gevret gant ul lise d’eus ar vro. Ur c’harr-boutinad leun a liseidi (ket dre ret fin-tre ‘pad ar sonadeg ouzhpenn, grrrr) a oa war al lec’h. (Ha gellet ‘zo bet tapout ur banne Leffe goude ma vijent aet kuit, ouf ! ^^)

War al leurenn e oa Rocé gant un DJ, barrek-tre, met lonket e anv ganin siwazh, gant ar vezh (menegiñ ‘rin anezhañ aze pa vo bet adkavet ganin).

Ispisial e oa un tamm ar sonadeg-mañ (chañs o deus bet ar Gastelliniz !) dre ma oa ar wech kentañ evit ar rapour kanañ an tonioù a vo war e bladenn nevez, Gunz ‘N Rocé. N’eo ket bet merzet re dre ma n’anaveze ket an dud an tonioù met anzavet en deus Rocé d’ar re a zo bet o komz gantañ goude (me en o zouezh) e oa faziet un tamm war ar pozioù (pardonet eo).

‘Pad hanterenn gentañ ar sonadeg en deus kanet Rocé e donioù kozh, ha n’int ket kozh tonioù tamm ebet ! Tonioù a zo tu da glevet war an teir fladenn gentañ : Top départ, Identité en crescendo ha L’être humain et le reverbère. Tonioù evel Changer le monde, Les gens parlent, 10/10, Ricochets, Besoin d’oxygène, L’être humain et le reverbère, Jeux d’enfants, Des questions à vos réponses…

 

‘Pad an eil lodenn hon eus bet ar chañs da glevet tonioù nevez neuze. Ur sapre albom ‘vo an hini da zont me lâr deoc’h. Un toullad tonioù ouzhpenn mat a zo, war a bep seurt sujedoù : al lavar, an habitus, an huñvreerezh… Un danvez « tub » a zo ivez, un ton nerzhus hag efedus ma zo unan. N’on ket sûr d’eus pe ditl a vo roet dezhañ, met kredapl un dra evel « J’rappe pas pour être sympa ».
Ton nemetañ an albom da zont a c’haller kavout war Internet ‘vit c’hoazh a zo « En apnée », deoc’h da gaout un tañva daoust ma n’eo ket an hini a blij din ar muiañ.

 

Dalc’het eo bet gant Rocé evit an adc’halv an ton en deus roet brud dezhañ e bed ar rap : On s’habitue.

 

Ouzhpenn bezañ barrek war ar rap ha speredek eo simpa-tre Rocé. Bet ‘m eus tro da gaozeal gantañ un tammig, ha da gaout ur gêrig war ma fladenn L’être humain et le reverbère. #drant