Devil’s Fire / Charles Burnett (2004)

Posted: 17 Even 2013 in Sinema
Tikedennoù:, ,

« The Blues » a zo un dastumad seizh film kinniget gant Martin Scorsese gant ar pal reiñ da zizoloiñ ar sonerezh-se da dud n’int ket boas ganti. Pep film a zo gant ur sevener disheñvel, lod anavezet mat en o zouezh : Scorsese ‘vel-just, met ivez Clint Eastwood pe c’hoazh Wim Wenders da skouer. Pep hini anezho a vourr ouzh ar blues hag en deus bet c’hoant kemer perzh er raktres-mañ.

Charles Burnett, sevener un nebeut filmoù evel Killer Of Sheep ha To Sleep With Anger a gont deomp e vugaleaj hag e darempred gant ar blues war ar memes tro.
Sod e oa e vamm gant seurt sonerezh pa soñje e vamm-gozh, bigodez ma oa unan, e oa ur pec’hed selou seurt traoù.
Evit kontañ e istor e vesk Charles Burnett skeudennoù enrollet d’ar mare-se gant lod all, troet gant aktourien a-ratozh.

Kregiñ ra ar film e 1956. Kaset ‘vez ar paotrig Burnett, 11 vloaz, e Su ar vro da vezañ badezet. Eno e tizolo ar blues gant e eontr Buddy. Pladennoù 78 tro a zo e pep korn e di ha sevel a ra bep mintin o tañsal war un ton blues bennak. A bep seurt arzourien a selaou ha deskiñ ra buan a-walc’h d’ar paotrig Charles seniñ tonioù gant e drompilh. An on kentañ pleustret gantañ a zo Saint Louis Blues gant W.C. Handy (da glevet amañ dindan).
Kanaouennoù kailh evel re Lucille Bogan a glevas ivez ar paotrig : peadra da zeskiñ anvioù lodennoù ar c’horf !

Ar film a gont deomp ivez un tamm istor ar blues met hep bezañ randonus. Penaos eo liammet ar sonerezh-se gant ar sklavelezh, al labour tenn er parkeier kotoñs pe c’hoazh al labour ret. Penaos n’eo ket relijiel ar blues evel ma’z eo ar gospel. Penaos ez eus atav bet merc’hed o kanañ koulz ha paotred. Penaos e kouste 3 dollar ur gitar d’ar poent-se, alese ar fed m’eo bet dibabet ar benveg-mañ gant kalz tud. Hag a bep seurt traoù ken dedennus all c’hoazh…

Sonerezh blues ‘vez klevet dibaouez ‘vel-just, an tonioù o vezañ gant a bep seurt bluesmen ha blueswomen anavezet mat pe tamm ebet.
Tonioù a vez klevet traken met alies e weler enrolladennoù video kozh : ur blijadur lakaat dremmoù war seurt sonerezh. Un toullad sonerien a glever, en o zouezh Big Bill Broonzy, Son House, Sister Rosetta Tharpe, Mamie Smith (kentañ maouez o vezañ bet enrollet un ton blues), Ma Rainey, Ida Cox, Dinah Washington, Sonny Boy Williamson, Blind Lemon Jefferson, Sam Chatmon, Gary Davis, Mississippi John Hurt, Muddy Waters, T-Bone Walker, Lightnin’ Hopkins, Bessie Smith, Elizabeth Cotten, Willie Dixon, Victoria Spivey, Brownie McGhee & Sonny Terry, John Lee Hooker, hag all hag all…

Ma plij deoc’h ar blues pe ar sonerezh dre vras ha m’emaoc’h kurius un tamm ho po plijadur gant ar film-mañ kredapl.

Iskisat tra. N’on ket deuet a-benn da gavout ur filmig-tañva met ar film a-bezh, digudenn (e saozneg istitlet e kastilhaneg).

Advertisements

Lezel ur respont

Fill in your details below or click an icon to log in:

Logo WordPress.com

Emaoc'h oc'h ober un evezhiadenn gant ho kont WordPress.com Log Out /  Kemmañ )

Google+ photo

Emaoc'h oc'h ober un evezhiadenn gant ho kont Google+ Log Out /  Kemmañ )

Skeudenn Twitter

Emaoc'h oc'h ober un evezhiadenn gant ho kont Twitter Log Out /  Kemmañ )

Luc'hskeudenn Facebook

Emaoc'h oc'h ober un evezhiadenn gant ho kont Facebook Log Out /  Kemmañ )

War gevreañ ouzh %s