Dielloù evit Meurzh, 2013

Gary Moore (1952-2011) a oa ur gitarour ha kaner norzhiwerzhonat ganet e Belfast.
Ur sonerezh divoutin a-walc’h a zo gantañ, a vesk sonioù an hard-rock gant re ar blues, ha ma vez santet enni levezon ar sonerezh hengounel iwerzhonat, en un doare splann a-walc’h a-wechoù. Sonet en deus meur a wech Gary Moore e Montreux (festival jazz brudetañ ar bed hervezon) met kazi sûr on en defe gellet seniñ memes mod en Hellfest da skouer.

Evit prouiñ deoc’h ne gontan ket gevier e c’hallan lâret deoc’h ‘oa bet pedet e Klison e 2011 ar strollad rock iwerzhonat Thin Lizzy. Dav eo goût ez eo bet Gary Moore unan eus sonerien gitar ar strollad er bloavezhioù 70 ha 80 ha gantañ an hini eo, dreist-holl, ez eo bet savet an albom Black Rose (hini gwellañ ar strollad ?) hag an ton Róisín Dubh (Black Rose): A Rock Legend (da selaou amañ m’ho peus c’hoant), unan eus tuboù ar strollad.

Siwazh, kudennoù alkool a oa gant ar paotr Gary, hag adkavet eo bet marv e miz C’hwevrer 2011 e kambr ul leti e Bro-Spagn, gant kazi 4 gram alkol en e wad, re evit e galon atav. Aet eo kuit kalz re abred, ne oa ket 60 bloaz zoken. 😦

Golo

Ar bladenn Live at Montreux 2010 n’eo ket da vat ur « best of » met tennañ ra da se gant ma kaver warni darn vrasañ tonioù brudetañ Gary Moore.
E sonadeg diwezhañ da vezañ bet enrollet eo ivez allas, met pebezh hini ! Un eurvezh ha kard bennak startijenn, from ha c’hoari gitar espar ! Ne skuizhaan ket ouzh he selaou. Ar seurt sonerezh a ra dija deoc’h santout un dra bennak war bladenn met a ro deoc’h kroc’hen gwazi pa weler an abadenn ‘vit gwir sûr mat.
Ar sonerien gantañ war al leurenn ar wech-mañ a oa Neil Carter (klavieroù), Jonathan Noyce (gitar-boud) ha Darrin Mooney (taboulinoù).

En ton a zigor ar sonadeg azeulet-mañ (gant fans Gary Moore da nebeutañ), Over the Hills and Far Away, e klever anat levezon ar sonerezh Iwerzhonat, chomet tomm da galon paotr Belfast.

 

Tonioù muioc’h bluesy a sone Gary Moore ingal, evel Still got the Blues, unan eus e donioù anavezetañ. Truchañ ‘ran un tamm rak m’en deus sonet an ton-se e Montreux e 2010 n’emañ ket war ar bladenn diwar al leurenn met war an DVD hepken.
Ya, rak un DVD d’eus ar sonadeg-mañ a zo ivez, gant daou don ouzhpenn ‘keñver ar bladenn : Still got the Blues neuze, ha Thunder Rising. Un nebeut tonioù bonus, tennet d’eus sonadeg Montreux 1997 a zo ivez. Dav ‘vo din klask e welet poent pe boent.

 

N’eus ket un ton displijus war ar bladenn met lod a zo nerzhusoc’h ‘vit ar re all, evel Blood of Emeralds, Days of Heroes pe c’hoazh Oh Wild One.
Klozet oa bet an abadenn zreist-se gant an ton Parisienne Walkways.12 munutenn gitar da eñvoriñ, gant mareadoù solo digredus hag ehanoù efedus. Na fromus ! N’eus ket kalz tud par da C’hary Moore ‘vit lakaat o gitar da leñvañ a seurt.

Gary Moore A.KA. « The Lord of the Strings », ur « guitar hero » marvet kalz re abred.
Da zizoloiñ eta, ha n’eo ket ober vann hañ !

Listennad tonioù ar bladenn « Live at Montreux 2010 » :

1. Over the Hills and Far Away
2. Military Man
3. Days of Heroes
4. Where Are You Now ?
5. So Far Away / Empty Rooms
6. Oh Wild One
7. Blood of Emeralds
8. Out in the Fields
9. Walking by Myself
10. Johnny Boy
11. Parisienne Walkaways

Advertisements

Jesus Camp a zo un teulfilm amerikan gant Heidi Ewing & Rachel Grady diwar-benn pouez ar brotestanted avielour integrour er gevredigezh hag o mod da dreuzkenteliañ ar vugale.
Deuet eo er-maez e 2006 eno, e 2007 e Frañs (1e25mn). Anvet e oa bet ‘vit Oscar ar gwellañ teulfilm met kollet en doa ‘enep film Al Gore war ardommañ an hin.

Skritell Jesus Camp
Spontus eo an teulfilm-mañ. Ur flac’had kreiz ar fas, dibosupl chom diseblant.
N’on ket paotr ar relijion, daoust din bezañ bet badezet, kumuniet ha stlejet alies d’an oferenn gant ur vamm kristen…
Daoust din bezañ dizouead hag evit al laikelezh n’on ket a-enep an dud a vev o feiz hep amerdiñ ar re all. Pep hini ‘zo lip’… Met ne c’hallan ket gouzañv an integristed, n’eus forzh peseurt kredennoù relijiel a vefe ganto…
Ar pezh a spont er film-mañ eo an doare ma four an dud-se mennozhioù e penn bugale ne c’hallont ket dibab o-unan d’an oad ma ‘z int. O fal a zo sevel un arme a vugale a vije o rol strewiñ ar feiz, pe kentoc’h o feiz, er gevredigezh a-bezh, o ‘n em silañ e kement plas strategel : er politikerezh, en ekonomiezh hag all… Aozet e vez ganto kampoù hañv, ma vez soubet ar vugale er relijion a-hed an deiz ha bemdez Doue (oups ! ^^) en un doare feuls a-walc’h. Gwelet ‘vez bugale treantet, o leñvañ pe c’hoazh o huchal e vint prest da vervel evit Jezuz ha me oar petra c’hoazh…
Ha fier-ruz eo Becky Fischer, ar bastorez a aoz ar c’hampoù-mañ, da zisplegañ deomp eo dreist ar vugale etre 7 ha 9 bloaz dre ma’z eo an oad gwellañ evit fourañ en o fenn mennozhioù a vo dalc’het en o memor o buhez pad. Displeget e vez dezho n’eo ket posubl krediñ er big bang pe c’hoazh difennet dezho karout Harry Potter dre m’eo ur sorser, ur c’hrouadur diaoulek.
Heuliet e vez a-dostoc’h tri bugel, Levi, Rachael ha Victoria, trelatet da vat dija gant ar relijion (met dav eo gwelet e peseurt endro e vevont, e peseurt familhoù…). Levi en deus c’hoant bras dont da vezañ pastor ha gwelet e vez o prezeg. Barrek eo dija ‘vit gwir, ur souezh. Rachael he defe c’hoant dont a-benn da gendrec’hiñ tout an dud. Gwelet e vez o vont da blantañ kaoz er straed gant tremenerien n’o deus goûlet netra dezhi, ha sevel goulennoù personel dezho war o feiz hep mezh ebet ha gant ar c’hoant anat o lakaat da cheñch ali. Iskisat tra.

Ur film dedennus-tre eo Jesus Camp, unan kreñv-mat ha direnkus da welet, zoken, pe dreist-holl, evit ar gristenien o-unan d’am soñj. Diaes eo gwelet na pegen pell e c’hall mont an traoù e lec’hioù zo. Re bell d’am soñj…
Kendrec’het on n’eus nemet ur c’hammedig etre relijion ha ranngredenn met ar gristenien-se a zo spontusoc’h ‘vit tud rannkredennoù-zo, sûr-mat…
Erfin, n’eo ket ar film na me a lakao pep tra da cheñch ‘m eus aon…

Ar filmig-kinnig, deoc’h da gaout un tañva

Disadorn, da geñver nozvezh ar St-Padrig hag ar c’hrogad Lig 1 An Oriant – Brest ez eus bet roet an dro da skipailhoù mell-droad gouezelek An Oriant ha Brest c’hoari ur c’hrogadig dispakañ er Voustoer, a-raok match ar c’hoarierien a-vicher.

Evel ma ne ouzoc’h ket sur-walc’h, e c’hoarian mell-droad gouezelek e skipailh Kerne (Kemper-Lokorn) dibaoe ar bloaz-mañ met un nebeut Kemperiz, me en o zouez neuze, ‘zo bet pedet gant Brest (trugarez vras dezho !) a-benn klokaat o skipailh.

Ur blijadur bugel ‘vidon c’hoari en ur stad bras (met kazi goullo siwazh, re abred ma oamp bet programet) ha dizoloiñ eus a dost-tre geotenn sintetek brudet ar Voustoer (ar stad kentañ e Frañs gant seurt leton ma ne fazian ket). Un nebeut c’hoarierien a zo bet o arvestiñ ouzhomp ur mare, ha ni da c’hoari dirak daoulagad Audard pe c’hoazh Giuly !

Ne oa Brestad ebet laouen da vont gward ha damc’hloazet on er mare-mañ setu e oan laouen da vont er palioù (kreiz an dachenn vezan boas). Evit un taol-esae n’eo ket bet re fall. Ne ‘m eus kemeret nemet daou bal ha ne c’hallen ket ober kalz tra ouzhpenn.

Buan ha buan, reolennoù pennañ ar vell-droad gouezelek, evit ar re a vije dedennet (tremenit ar rannbennad-mañ mod all).
War un dachenn foot (pe dost), 11 c’hoarier e pep skipailh (15 e Bro-Iwerzhon).
‘Vit ur c’hrogad gwir ‘vez graet div hanterenn 35mn sañset, met alies e reer tournamantoù, gant meur a grogad berroc’h neuze (2×10 pe 2×15).
Ar vell a c’hell bezañ c’hoariet gant an troad koulz ha gant an daouarn.
M’emañ ar vell war al leur, n’haller ket kemer anezhi gant an daouarn. Dav eo ober ur “pick up” da lâret eo lakaat anezhi da zibradañ gant an troad, a-raok kenderc’hel gant an daouarn.
Ar pasoù a vez graet gant an troad, pe gant an dorn o skeiñ er vell ha n’eo ket o vannañ anezhi.
Difennet eo redek muioc’h ‘vit 4 eilenn gant ar vell. D’ar mare-se eo dav ober ur pas, pe un dribl gant an dorn (‘giz er vell-dorn pe er vell-baner), pe c’hoazh ur solo (touchañ anezhi gant an troad) ur wech an amzer, hag a bep eil.
Dav eo klask lakaat ur pal (3 foent) pe neuze tennañ dreist d’ar pal etre ar peulioù (1 poent).
Difennet groñs eo an takloù hag ar plakoù. ‘Vit adtapatout ar vell e c’haller skeiñ warni gant an dorn p’emañ e daouarn egile, pe klask daspakañ pasoù ar skipailh all. Ar skoaz ouzh skoaz, zoken rust a-walc’h, a zo aotreet.

Ma ‘z oc’h dedennet, ha deoc’h da gaout ur vennozh d’eus pezh c’hall bezañ ar sport dianav-se, ar match a-bezh a zo bet filmet hag a zo roet da welet war Internet. Daou filmig a zo, unan dre lodenn (amañ-dindan).

N’eo ket bet dreist ar match a-fed kalite c’hoari (kalz bolotennoù kollet ha fazioù dorn) met engouestl a zo bet gant peb a skipailh hag a-benn ar fin eo bet trec’h Brest 4-2 / 2-4 da lâret eo 14-10 (4 fal ha 2 « 1 poent » enep 2 bal ha 4 « 1 poent »).

‘Vel ma ‘m eus bet tro da lâret d’ar Vrestiz a c’hoarie ganeomp, da nebeutañ e vo bet gounezet ur c’hrogad gant Brest an noz-mañ.

Ya, rak da heul e oa neuze ar match mell-droad Lig 1 etre an FC An Oriant ha Stad Brest.
Sur e oan e vije bet trec’h An Oriant met n’em bije ket kredet e vije bet dastummet ur roustad a seurt gant Brest memestra. Ur blijadur ‘vidon, skoazeller Gwengamp ma’z on, ha plijet gant ar c’hoari brav, ‘vel hini an Oriant (c’hoari bravañ Lig 1 sur ‘walc’h, gant St-Etienne marteze…) arvestiñ ouzh seurt krogad.
Pal kentañ goude 3 munutenn, eil goude 8 munutenn, graet ar jeu dija, ha 4-0 ‘vit ar Verluzed e fin ar gont. 5 pe 6 o dije gellet lakaat aes…
Dreist-holl, ouzhpenn ar skor, eo kentoc’h an doare a ra aon din evit dazont Brest. N’eus bet c’hoari ebet kinniget ganto, n’o deus ket bet an dro da reiñ aon da zifenn An Oriant. A boan m’en deus touchet Audard (gward An Oriant) ar vell : un duvell gounezet enep Licka ha melloù tapet war an tennoù a-gorn traken. N’eus bet netra mat ‘kostez Brest ar wech-mañ, un tamm c’hoant ober mat marteze, ha c’hoazh…
Nozvezh dreist ‘vit an tredeog, nebeut-tre a fazioù hag ur c’hartoñs melen hepken, e fin ar c’hrogad.
Pulluc’het eo bet ar Vrestiz propr ha naet, netra da lâret.

Ma kendalc’h paotred Brest gant seurt (nann)c’hoari ne welan ket re penaos c’hallfent chom er c’hentañ rummad, pe neuze vije gwashoc’h ar re all…
Klevet ‘m eus tud o lâret o doa al live Lig 2 met n’on ket a-du tre. Skipailhoù Lig 2-zo a c’hoari kalz gwelloc’h, Gwengamp da skouer. ^^
Ma, penaos ‘vo graet gant Gwengamp ‘vit gounid enep Brest ‘benn bloaz ma tiskenn ar Vrestiz ?! Ni ra ur striv ‘vit pignat, grit unan ‘vit chom er c’hentañ rummad noñdedie !

Kentoc’h sioul eo ar Voustoer peurliesañ, keñver ar Roudourou pe Francis Le Blé da skouer, met gwir eo eo bet trouzus a-walc’h an arvesterien disadorn. N’eo ket bemdez ma vez friket an amezeg en un derby. N’eo ket bet displijus an troioù « ola » hag ar goaperezh ouzh ar Vrestiz e fin ar c’hrogad me lâr deoc’h !

Un diverrañ video d’eus ar c’hrogad gant ar palioù a c’heller gwelet war lec’hienn Ar Skipailh, dre amañ.

Plijus a nozvezh mell-droad eta !

Dibaoe bloavezhioù e plij din kalz Oxmo Puccino ha selaou ouzh unan eus e bladennoù ur wech an amzer. Pa ‘m eus gwelet e oa da zont da Vrest ‘m eus tapet ma flas raktal.
Mat ‘m eus graet rak dreist e oa sonadeg Oxmo met dizoloet ‘m eus ivez ur strollad dreist a rae al lodenn gentañ : Cabadzi. Krogomp ganto neuze.

4 den a bign war al leurenn, 4 den « normal », ha n’o deus ket tamm ebet liv ar rap war o dilhad. Ur rapour/kaner, ur plac’h gant he gourebed hag o kanañ flour ivez, ur beatmaker barrek gant an MPC ha barrekoc’h c’hoazh war an human beat box (ha gouest da seniñ gant an ukulele ivez!), hag ul liessoner gitar/trompilh/tuba…
Plijet en deus din diouzhtu o sort hip-hop hiron ha dibar. Ar sonerezh ‘m eus kavet dreist hag ar pozioù dedennus-tre. Ouzhpenn-se e kasont un dra bennak da vat war al leurenn, un dra kreñv a-walc’h (ar c’hroc’hen gwazi o deus roet din war tonioù-zo). Aliañ a ran deoc’h groñs dizoloiñ ar strollad hag o albomoù (daou evit poent). Sed aze dija un nebeut tonioù, da gaout un tañva.

N’eo ket tout, met evit gwelet Oxmo Puccino e oan deuet memestra.

Oxmo a zo un den a gont e bed ar rap e galleg. Kroget eo da rapiñ e penn-kentañ ar bloavezhioù 1990 met an ton en deus roet brud dezhañ, Mama Lova, gant DJ Kheops, a zo eus 1998.


C’hwec’h albom a zo, holl mat-kenañ, e lec’h ma rap Oxmo war a bep seurt sujedoù. N’eo ket eñ paotr ar gerioù gros hag ar feulster : tra’bet da welet gant ar gangsta rap. An testennoù a zo barzhoniel-tre, ha dous a-walc’h peurliesañ, war traoù ar vuhez dreist-holl. Plikout a ra dezhañ kalz ar sonerezh gall hengouneloc’h ha lesanvet eo bet le « Black Jacques Brel ».
Ar sonerezh a zo dous ivez, liv an jazz warni alies.

N’on ket bet dipitet tamm ebet gant ar sonadeg. Dreist e oa Oxmo, a vez santet laouen-tre d’eus ar pezh en deus ar chañs d’ober ha fier d’eus e arvesterien. Tro-dro dezhañ, sonerien eus ar re varrekañ ouzh ar piano, ar gitar, ar gitar-boud, an taboulinoù…

Evel-just, pa krog un arzour da gaout un toullad kanaouennoù, ne c’hall ket ober an holl dindan ur sonadeg, setu on bet dipitet un disterig da vezañ chomet hep klevet tonioù-zo a blij din kalz, evel Mama Lova pe La danse couchée.

An tonioù en deus kanet a zeue d’eus an holl albomoù.
Un nebeut tonioù d’eus ar re gentañ, Opéra Puccino (1998), gant L’enfant seul da skouer, pe d’eus L’amour est mort (2001), gant J’ai mal au mic da skouer, betek an hini diwezhañ.

Tonioù ma fladenn karetañ (L’arme de Paix, 2009) a oa ivez, evel Soleil du nord pe 365 jours.

Kalz tonioù kanet digwener paseet a oa tennet d’eus ar bladenn diwezhañ, Roi sans carosse (2012), pladenn en deus roet an tu da Oxmo da c’hounez ur « Victoire de la musique » ar bloaz-mañ, hini ar rummad « musiques urbaines » (ya, iskis, diaes eo da dud zo lâret ar gêr rap sur ‘walc’h). Tonioù evel Le sucre pimenté, lec’h m’eo bet lakaet an holl da gemer perzh, pe c’hoazh Pam-Pa-Nam.

An adgalv kentañ a zo bet hirik, gwell a se, gant nebeut tonioù evel L’enfant seul da skouer. Un eil adgalv omp deuet a-benn da gaout hag echuet eo brav ar sonadeg war Le cactus de Sibérie.

Ma plij deoc’h Oxmo, kit da welet anezhañ, talvezout a ra ar boan, sur !

Eil bloavezh m’emaon o chom e Kemper, hag eil bloavezh e yan d’ur sonadeg da vare gouel an Hivernautes.
E ya, profitañ ‘ran, evit ur wech ma c’hoarvezh un dra bennak er gêr-mañ ha n’eo graet na ‘vit an trede oad na ‘vit ar vourc’hizien. Ijinit-ta, gwelet ‘zo bet tud er straedoù goude 11e noz ! Gnark gnark. ^^

Warlene ‘m boa bet ar chañs da zizoloiñ traoù dreist evel Le Cercle pe Krismenn (kaoz rin diouto amañ a-raok pell d’am soñj). Ar wech-mañ n’am eus gallet mont nemet da nozvezh an hip-hop (c’hwitet hini an elektro siwazh, ha ne vefen ket bet da hini ar metal).

4 strollad hip-hop/rap a zo bet klevet en Tog Ruz diriaou paseet neuze, evit unan eus ar sonadegoù diwezhañ el lec’h-mañ, a zeuio a-benn nebeut da vezañ ur greizenn kendalc’hoù.

En urzh tremen : Clara Kurtis, Micronologie, Casey ha Dope D.O.D.

Kemperiz eo paotred Clara Kurtis (plac’h ebet er strollad daoust d’an anv), strollad bet ganet e 2010. N’am eus ket o gwelet en Tog Ruz dre ma ‘m boa graet dija miz zo bennak e Kastellin. A-hervezh un den en deus klevet an div sonadeg e oa gwelloc’h hini ar Run ar Puñs ouzhpenn-se, setu n’am eus ket c’hwitet kalz tra.
Plijus da glevet eo ar pezh a reont, ur seurt hip-hop nerzhus a-walc’h, gant binviji gwir war al leurenn. Plijout ‘ra din ar sonerezh met n’on ket bet kendrec’het gant ar pozioù ha gant ar c’han.

 

Da heul e sone ar strollad Micronologie, Roazhoniz ar wech-mañ.
Pellik-zo o anavezan, a-drugarez d’an ton o deus graet gant ar strollad trad/ska gallaoueg IMG, « Rap tour » (da selaou amañ). Ur bladenn gentañ, (ket fall hag anvet « Micronologie ») o deus graet e 2005 (dija !), hag un eil, simpa-tre, « Art, Rythme, Éthique », e 2009. Gounezet o deus « taol-lañs an Erer Yaouank » e 2008, ar pezh n’eo ket netra ! Ar chañs am boa bet da gaozeal un tamm ganto e tavarn VIP an Erer Kozh ar bloavezh war-lec’h (roet o doa din ur vaketenn), ha gellet am eus en ober en dro diriaou, goude o sonadeg. Paotred simpa anezho ouzhpenn.
Un DJ ha 3 MC a zo. Troet int war du ar sonioù jazzy ha funky dreist-holl. Barrek eo ar rapourien (K.Oni, Safirius ha Casta), ur flow efedus gante o zri, ha santet ‘vez mat eo ur blijadur ‘vito c’hoari gant ar yezh da lakaat anezhi da seniñ brav, klotennoù hag all. DJ Sambal (bet ‘pad bloavezhioù o seniñ en ur bagad kostez Roazhon !) a zo barrek ivez. Nerzhus hag efedus int o fevar war al leurenn muioc’h c’hoazh ‘vit war ar pladennoù.
Er set kinniget diriaou e oa un toullad tonioù anavezet ganin, hag un nebeut re nevez. Un trede pladenn a vo o tont a-benn nebeut sañset, yeah.

 

 

Casey a oa da heul, ur rapourez engouestlet a blij din a-walc’h.

N’on ket sot gant ar sonerezh met ar pozioù, don ha speredek, a blij din kalz. He unan e oa war al leurenn gant un DJ.
Kregiñ ‘ra da vezañ anavezet un tamm, e bed ar rap da nebeutañ, hag un trede pladenn a zo raktreset evit ar bloaz-mañ. Kanañ a ra war a bep seurt sujedoù, hogen a orin eus ar Martinik eo Casey ha prederiet kalz eo gant ar vorianegezh (négritude), istor ar sklavelezh…

He zub a zo « Apprends à t’taire » ‘lec’h ma ra goap d’eus ar rapourien n’o deus netra da lâret hag a ra fazioù yezh ouzhpenn-se…
« Quoi ? Chez toi, y a pas l’dictionnaire ? Alors apprends à écrire s’te plaît ou apprends à t’taire. »

Farsus un tamm met n’eo ket ma zon karetañ ganti pell ac’hann. Un toullad kanaouennoù mat a zo met Un sac de sucre pe Chez moi a blij din kalz.

 

 

 

Evit klozañ ganti e oa ar strollad Izel-vroad Dope D.O.D., hag a grog da vezañ anavezet mat gant ar grennarded a blij dezho ar rap. N’eo ket re ma zasad te met ‘benn ar fin on bet plijet a-walc’h ouzh o gwelet. Un hip-hop trouzus ha nerzhus eo, gant tonioù boud kreñv. Liv ar metal a zo war ar ganerien (o tiskouez o biz-brasañ ‘pad ar sonadeg pa n’emaint ket o evañ scotch pe o butuniñ) hag un tammig war ar sonerezh. E saozneg eo ar pozioù met ansav a ran n’on ket bet da welet a dost d’eus petra oa kaoz.

Kudenn : kredet n’ deus unan eus ar rapourien pignat war al leurenn gant ur roched d’eus ar Stade Brestois, fazi bras ! Ne oan ket ma unan o huchal « Gwengamp Gwengamp » d’ar mare-se. ^^


Ur pennad war ur sonadeg all a vo da zont buan…

Comment je me suis fait plaquer… et autres histoires extras et ordinaires, embannet gant Dupuis e 2011 a zo ur vannenn-dreset enni 15 istor berr a-zivout ar garantez. Pep hini anezho a zo gant un oberour(ez) disheñvel, pe meur a hini. Din n’eus ket kalz anvioù anavezet (Bastien Vivès ha Thomas Cadène hepken e gwirionez) met d’ar re a gustum lenn kalz bannoù-treset pe mont war blogoù arbennik e vo muioc’h kredapl.

Poan ‘m eus d’ober berr boas (spi ‘m eus n’oc’h ket re zirenket gant hirder ma fennadoù a-wechoù ^^) met ar wech-mañ n’em eus ket kalz tra da lâret.

Ne oan ket kendrec’het dija o amprestiñ al levr met c’hoant ‘m boa da welet ar pezh o doa oberourien BT a-vremañ da gontañ a-zivout ur sujed ken ledan ha mil anavezet hag ar garantez. N’on ket bet kendrec’het muioc’h ur wech al levr echuet. N’eo ket nul pep tra met n’eus netra dreistordinal kenebeut. Disheñvel-tre an doareoù tresañ hag an istorioù met n’eus hini ebet en deus dalc’het ma evezh ‘vit gwir.

Dre chañs, lennet ‘vez al levr buan-tre (un hanter-eurvezh bennak) met ankoueet ‘vo ivez pep tra ganin ken buan all m’eus aon. Ul levr da amprestiñ pe da lenn er stal-levrioù perak pas, met ne alifen da zen ebet da zispign 20€ ‘vit se.

Ur pennad ispisial un tamm ar wech-mañ, n’eo ket en e stumm met peogwir ez eo bet skrivet IVEZ (ha n’eo ket hepken, ‘vel-just) gant ar soñj kenstrivañ da geñver deiz ha bloaz ar blog Soubenn ar geek (gwelet amañ). Ra ma vevo pell c’hoazh !

Black Books a zo ur stirad fent saoz bet krouet e 2000 gant Dylan Moran ha Graham Linehan evit Channel 4.
Tri bloavezh a zo hepken, siwazh, gant nebeut a rannoù (6 dre vloavezh), ha rannoù berr war ar marc’had (26mn).

E Bro-C’hall eo tremenet ar stirad war Canal + a-hervezh met n’am boa morse klevet komz d’eus Black Books a-raok amprestiñ an DVD er vediaoueg, goude bezañ bet aliet groñs d’e sellet gant ul levraouegerez (trugarez dezhi evit he alioù fur).

Bernard Black (c’hoariet gant Dylan Moran) a zo ur werzher-levrioù. Plijout ‘ra kalz dezhañ al levrioù met ne c’houzañv ket ar pratikoù a gred dont d’e zirenkañ ! Sikouret e vez en e stal gant Manny (Bill Bailey), an hini nemetañ a labour ‘benn ar fin. Tremen ‘ra ivez alies Fran (Tamsin Greig), ur vignonez da Vernard.

Lâret ‘ran deoc’h diouzhtu, ur fan d’eus Black Books on bremañ ha kavout a ran dipitus ne vije ket bet kendalc’het pelloc’h gant ar stirad, ken fentus ma ‘z eo.

Morse n’en deus ur stirad graet evit bezañ fentus graet din c’hoarzhin kement. C’hoarzhadennoù diroll am bez seul wech ma welan ur rann, ha ranket ‘m eus lies gwech lakaat an DVD war ehan, amzer adkavout ma alan un tamm ha chom hep mervel gant ar c’hoarzh. Pa oan o chom en ur ranndi ne greden ket kregiñ da sellet unan re ziwezhat gant an aon direnkañ an amezeien !


Diaes eo dija termeniñ ar fent dre vras. Hini Black Books a zo liesseurt a-walc’h ouzphenn-se. Fent du a zo un tamm, Bernard Black o vezañ dengasaour ha kinek, hogen fent droch a zo dreist-holl, fent saoz hag emsiv, un tamm giz hini ar Monty Pythons da skouer. E pep rann e c’hoarvezh traoù droch hag en em gavout ‘ra an tudennoù e degouezhioù dibosupl, pe abalamour d’ar re a alkool lonket pe d’ar re a c’hevier livet, pe d’ar merc’heta/paotreta, hag all hag all…
N’eus nemet un dra a zisplij din e Black Books : ar c’hoarzhoù enrollet. N’am eus biskoazh gellet o c’houzañv, e mod ebet. Met amañ da vihanañ e c’hoarzher a-gevret gant ar c’hoarzhoù, ar pezh n’eo ket gwir atav, pell ac’hann.

Me lâr deoc’h, ma plij deoc’h c’hoarzhin, n’am eus ket kavet gwelloc’h ‘vit Black Books ‘vit en ober a-leizh kof, goude un devezh-labour tenn pe evit cheñch mennozhioù pa vezer o magañ soñjoù du.
Ha kredit ac’hanon, dañjerus eo klask debriñ pe evañ an disterañ tra/banne o sellet ur rann : mougañ a rafec’h buan. Skiant prenet ha bevet.

Ar rann kentañ, e saozneg, a c’heller kavout da welet war Youtube, amañ dindan, deoc’h da gaout un tañva.