Dielloù evit C'hwevrer, 2013

De briques et de sang a zo ur vannenn-dreset gant François Hautière (senario) ha David François (tresadennoù) embannet ‘ti Casterman (KSTR) e 2010.

Kregiñ ‘ra an istor e miz Here 1936. Da heul marv he zad e tiviz ur vaouez kontañ dre lizher d’unan all un istor kozh, bet c’hoarvezet un ugent vloaz-zo bennak. Un afer spontus.
Miz Genver 1914.
E Guise, e departamant an Aisne, e vez adkavet gant ar polis korf marv ur micherour-teuzer, just ‘kichen ar « familister » bet savet gant Godin. Un eil korf, hini un intañvez ar wech-mañ, a vez kavet nebell ur pemzektez bennak war-lec’h. Liammet eo an daou vuntr kredapl. Ul liesvuntrer a vije o kuzhat er « Palez sokial » ?
Ouzhpenn d’ar polis a vez o enklask. Ur c’hazetenner yaouank o labourat ‘vit L’Humanité a zo war al lerc’h, o klask diluziañ an afer. Seul vuioc’h a draoù a zesk, ha seul iskisoc’h e seblant dezhañ an afer bezañ.

Dedennus eo ar vannenn-dreset-mañ e meur a geñver.
Evit an istor, anat. Un enklask polis a zo, gant suspens, muntroù, hag un dibenn dic’hortoz ha deuet mat.
An tresañ en deus plijet din a-walc’h ivez : dibab al livioù, tresañ ar savadurioù… N’eus nemet an doare da dresañ dremmoù tudennoù-zo n’en deus ket ma c’hendrec’het (dizampart ‘m eus kavet un nebeut re zoken).

Hogen, dibarded an endro eo en deus plijet din ar muiañ.
Dibaoe ma bloavezhioù lise on bet dedennet gant istor an taolioù-arnod dispac’hour, istor Kumun Pariz, an diveliouriezh, ar raktresoù sokial hag « utopek »…
Anavezout a raen dija neuze un tamm istor ar familister (pe familisti neuze?), krouet e Guise gant Jean-Baptiste Godin (a oa e penn un embregerezh tommerezhioù) da heul mennozhioù Charles Fourier hag e « falañsti ». Daoust pegen dedennus m’eo lenn levrioù istorel ha « sirius » war seurt sujedoù, ur blijadur eo o adkavou e kreizhig-kreizh un oberenn faltazi. Enklaskoù o deus graet an daou oberour kredapl, rak ne soñj ket din e vije (mell) fazioù er pezh ‘gontont.

Ma n’anavezit netra da istor ar familister pe just m’ho peus c’hoant da lenn ur vannenn-dreset polis siñpa, kredit digeriñ De briques et de sang.

Advertisements

Rocé er Run ar Puñs (14/02/2013)

Posted: 20 C'hwevrer 2013 in Sonadegoù
Tikedennoù:, ,

Plijout ‘ra din kalz ar rapour Rocé, dibaoe un nebeut bloavezhioù bremañ, setu on bet souezhet bras, ha war an tu mat, pa ‘m eus gouezet e vije da dremen e Kastellin.
Komz a rin deoc’h en-dro amañ eus e bladennoù a-raok pell (unan nevez a vo fin miz Meurzh eta).

Ur rapour speredek evel ma n’eus ket kalz eo eñ (lesanvet eo bet « le rappeur philosophe »). Pep ton a ginnig pozioù labouret-kenañ ha gant ur preder don peurliesañ.
Ganet eo Rocé (José Kaminsky e anv gwir) e Aljeria e 1977 a-raok dont da Frañs bugel. E dad a zo ur rezistant brudet, Adolfo Kaminsky, hag e c’hoar, Sarah Kaminsky, aktourez ha skrivagnerez. Kompren a reer neuze un tamm gwelloc’h a belec’h e teu tro-spered hag engouestl ar paotr.

Er Run ar Puñs e oa an abadenn, ur sal e Kastellin deuet da vezañ en un nebeut mizioù ma lec’h karetañ ‘vit ar sonadegoù (ur pennad a rin sur’walc’h a-benn nebeut traken war al lec’h).

Iskis an deiziad (d’ur yaou da 8e30) hag ar priz (digoust). Gwashoc’h, dizoloet ‘m eus war al lec’h ne vije ket posubl tapout ur banne bier. Petra, « soirée sans alcool » ? ^^
‘Benn ar fin em eus komprenet e oa liammet tout-se gant ar memes abeg. Donedigezh Rocé e Kastellin a oa liammet gant ur raktres pedagogel, a-gevret gant ul lise d’eus ar vro. Ur c’harr-boutinad leun a liseidi (ket dre ret fin-tre ‘pad ar sonadeg ouzhpenn, grrrr) a oa war al lec’h. (Ha gellet ‘zo bet tapout ur banne Leffe goude ma vijent aet kuit, ouf ! ^^)

War al leurenn e oa Rocé gant un DJ, barrek-tre, met lonket e anv ganin siwazh, gant ar vezh (menegiñ ‘rin anezhañ aze pa vo bet adkavet ganin).

Ispisial e oa un tamm ar sonadeg-mañ (chañs o deus bet ar Gastelliniz !) dre ma oa ar wech kentañ evit ar rapour kanañ an tonioù a vo war e bladenn nevez, Gunz ‘N Rocé. N’eo ket bet merzet re dre ma n’anaveze ket an dud an tonioù met anzavet en deus Rocé d’ar re a zo bet o komz gantañ goude (me en o zouezh) e oa faziet un tamm war ar pozioù (pardonet eo).

‘Pad hanterenn gentañ ar sonadeg en deus kanet Rocé e donioù kozh, ha n’int ket kozh tonioù tamm ebet ! Tonioù a zo tu da glevet war an teir fladenn gentañ : Top départ, Identité en crescendo ha L’être humain et le reverbère. Tonioù evel Changer le monde, Les gens parlent, 10/10, Ricochets, Besoin d’oxygène, L’être humain et le reverbère, Jeux d’enfants, Des questions à vos réponses…

 

‘Pad an eil lodenn hon eus bet ar chañs da glevet tonioù nevez neuze. Ur sapre albom ‘vo an hini da zont me lâr deoc’h. Un toullad tonioù ouzhpenn mat a zo, war a bep seurt sujedoù : al lavar, an habitus, an huñvreerezh… Un danvez « tub » a zo ivez, un ton nerzhus hag efedus ma zo unan. N’on ket sûr d’eus pe ditl a vo roet dezhañ, met kredapl un dra evel « J’rappe pas pour être sympa ».
Ton nemetañ an albom da zont a c’haller kavout war Internet ‘vit c’hoazh a zo « En apnée », deoc’h da gaout un tañva daoust ma n’eo ket an hini a blij din ar muiañ.

 

Dalc’het eo bet gant Rocé evit an adc’halv an ton en deus roet brud dezhañ e bed ar rap : On s’habitue.

 

Ouzhpenn bezañ barrek war ar rap ha speredek eo simpa-tre Rocé. Bet ‘m eus tro da gaozeal gantañ un tammig, ha da gaout ur gêrig war ma fladenn L’être humain et le reverbère. #drant

Plijout ‘ra din kalz ar vell-droad, da c’hoari pe da arvestiñ, met anzav a ran ne yan ket alies d’ar stad.
Gounezet ‘m eus ur plas ‘vit mont da welet An Oriant – Evian (trugarez Mammig ! 😉 ). Kinniget ‘zo bet din gant mignoned ar vell-droad gouezelek mont da welet Gwengamp – Naoned, ha me da lâret ya diouzhtu (Gwengamp eo ar skipailh tost d’am c’halon), a-raok merzout e oa an daou grogad da vezañ an hevelep devezh. Ne vern, da 2e g.m. e oa match Gwengamp, ha da 8e noz hini An Oriant. Bezomp foll, deomp d’an daou neuze !

Foto : DR

Gwengamp 2 – 1 Naoned

Pell-zo ne oan ket bet d’ar Roudourou da welet ur c’hrogad. Dibabet mat ‘ma match ‘m eus graet. Sapre partienn ! M’ho peus adkavet ur vouezh o straniñ e Gwengamp, ma hini eo, kollet ‘m eus anezhi eno disadorn. ^^

Kentañ hanterenn Gwengamp ‘zo bet nul da vat, kazi mezhus memes. C’hoant ebet ganto, maez-sujed da vat. Ouzhpenn-se n’haller ket lâret e c’hoarie mat an Naonediz zoken. C’hoari a raent, setu tout, ar pezh ‘n deus ankouezet ober Gwengamp. Kollet-mik ‘seblante bezañ ar c’hoarierien. Ha deuet eo a-benn Samassa, gward Gwengamp, da lakaat en e bal ur vell a vije aet er-maez mod all… 0-1 neuze.


O fegement o deus paket paotred an EAG gant Gourvennec ‘pad an troc’h kredapl, rak cheñchet krenn o deus o emzalc’h adalek an distro. Hag int da gregiñ da c’hoari brav, da lakaat ar gwask war an Naonediz ha da vezañ tagnous war pep kement mell a zo (ar pezh n’o doa ket graet tamm ebet betek-henn). Ha Kirikou da zont-tre war an dachenn (Ladislas Douniama e anv gwir, met e lesanv a gomprener aes pa ouzer n’eo ket bras an den hag e red kalz ha buan ^^.) Mat-kenañ eo bet ha gantañ eo bet graet an div gasadenn o deus degaset ar palioù. Ur c’hreiz kentañ evit penn Fauré, deuet-tre div vunutenn a-raok (e 100vet pal e Lig 2) hag un eil da heul, gant Yatabaré o splujañ da lakaat gant e benn ar vell e foñs pal Naoned. 2-1. Dirollet ar Roudourou, a oa kazi leun-chouk. Profitet ‘m eus 100%, o vezañ ma oan e tribunell ar C’hornôg ouzhpenn-se, gant tud ar C’hop Ruz. 🙂
‘Mañ ket pell al Lig 1 ken, war-raok Gwengamp !

(A-hent all, goût ‘ran ‘walc’h ez eus kalz harperien Naoned simpa met un toullad d’eus ar re deuet betek Gwengamp disadorn a oa amboubaled vrein. Klasket o deus cheu forzh pegement e kêr a-raok ar c’hrogad, un nebeut Gwengampiz o vezañ skoet gante, ha devet o deus skerboù ruz ha du. Tro-spered mezhus !)

An Oriant 2 – 1 Evian

Daoust din bezañ evit Gwengamp eo ar Voustoer ar stad m’on bet an aliesañ da welet krogadoù ennañ (o chom e Kemperle on bet ‘pad pell).
Kentañ hanterenn ar Verluzed ‘zo bet eus ar c’hentañ ‘keñver c’hoari. Heuliadennoù brav, mestroni hollel : kredet ‘vije bet gwelet c’hoari ar Barça enep da Getafe pe Valladolid, pe dost. ^^ Evian ‘zo chomet o tifenn, gant an unnek c’hoarier en o lodenn, hep ober netra pe dost (un tenn a-gorn) nemet redek war-lec’h ar vell. N’eus manket nemet un dra : palioù. Ranket o dije paotred an Oriant plantañ daou pe dri da vihanañ. Unan en deus lakaet Aliadière, ha c’hoazh, war ur penalty na oa ket anat da c’hwitellat.

Foto : DR

Un eil o deus lakaet neuze (78′), gant Monnet-Paquet (brav gwelet ar paotr-se o c’hoari). Adal neuze ‘zo bet merzet ur cheñchamant splann. Diskennet eo kalz ar Verluzed war an dachenn, da glask difenn o lañs, ha n’eo ket bet pell Evian ‘vit plantañ unan d’e dro (83’). Aon o deus bet neuze paotred an Oriant betek ar fin. N’eo ket cheñchet ar gont, dre chañs, ha trec’h ar re orañjez neuze (2-1), met dav ‘vije dezho deskiñ « lazhañ ar matchoù » abretoc’h p’o deus an dro d’en ober, kuit da chom hep strafuilhañ er munutennoù diwezhañ.

Laouen on bet ivez o welet e oa un tamm brezhoneg er Voustoer. War an traoù kartoñs roet da bep hini evit ober trouz, da skouer, e oa tu da lenn, war ur foñs mod banniel Breizh (ne oa ket gwenn ha du met orañjez ha du),  “Emañ an Oriant aze !”, skrivet e bras, hag e bihan dindan “Ici c’est Lorient !”. N’on ket sur e vije peurvat an droidigezh met n’eo ket fall dija ‘vije gwelet traoù skrivet e brezhoneg e lec’hioù ma vez miliadoù a dud ingal.

Ur sadornvezh mell-droad eus ar c’hentañ am eus bevet neuze, en deus roet din c’hoant distreiñ d’ar stad a-raok pell, dreist-holl ma kendalc’h Gwengamp gant e daolioù-kaer. 🙂

Gourfennoù Open Tennis Kemper 2013

Posted: 18 C'hwevrer 2013 in Sport
Tikedennoù:,

Evel prometet, ur gerig war gourfennoù Open Tennis Kemper on bet da welet dec’h goude merenn.

Da gentañ, c’hwitet mat ma fronostikoù ganin.
Biskoazh ne’m bije kredet vije aet ken pell ar Breizhad Marc Gicquel, a zo bet trec’h war Bautista-Agut (niverenn 1 an tournamant) e ¼ ha Steve Darcis (niverenn 3) e ½. Bravat tournamant pa ouezer ez eo paotr Sant-Brieg 35 bloaz dija !
Enep-tañ er gourfenn, Marius Copil, ur Rouman dianav din a-raok an tournamant. Trec’het en deus Gilles Muller ha Dudi Sela da vont ken pell memestra !

Foto : An Telegram

Leun-chouk e oa ar sal, entanet an dud, prest da reiñ nerzh d’ar Breizhad. Hogen, ‘vit lâret gwir, n’eo ket bet plijus-tre ar c’hrogad da welet abalamour da (nann-)c’hoari Copil. Ur paotr sonn eo ar Rouman, 1m93, 86kg. Servijet en deus ‘pad tout ar match evel un Isner pe ur Roddick (ouzhpenn 20 “aces”, 90% a boentoù gounezet war e servij kentañ !) : dibosubl da c’hoari ‘vit ar paour-kaezh Gicquel.

Klasket en deus ar Breizhad koulskoude, ha darbet eo bet dezhañ gounit ar set kentañ en tie-break, kollet justik ‘benn ar fin : 7-6(9).
En eil set en deus kendalc’het « ramz ar C’harpatoù » da servijout ‘vel ur robot, ha da c’hoari fin un nebeut poentoù. Digudenn eo bet ‘vitañ : 6-4

Dipitet-tre e oa Gicquel, c’hoant bras gantañ gounez e Kemper ‘vel-just. Ha muioc’h c’hoazh pa ouezer n’emañ ket sur distreiñ abalamour d’e oad, hag e oa atav bet trec’h war Copil betek-henn (2 bartienn gounezet war 2).

Foto : DR

‘Benn ar fin, ‘vit gwelet gwir tennis (eskemmoù gant ar volotenn petra !) e oa gwell erruout abred hag arvestiñ ouzh gourfenn an doubl, etre Jamie Delgado & Ken Skupski (Breizh-Veur) d’eus un tu ha Raven Klaasen (Suafrika) & Johan Brunström (Sveden) d’eus an tu all. Souezhadenn ebet en daolenn avat ar wech-mañ, an doubloù unan ha daou o ‘n em gavout asambles er gourfenn. Start eo bet ar match, ha sapre eskemmoù ‘zo bet. Benn ar fin eo bet trec’h Klaasen ha Brunström war ar Saozon : 3-6 / 6-2 / 10-3.

Laouen on bet o arvestiñ ouzh ar c’hrogadoù am eus bet tro da welet  ar sizhun-mañ ha mall ‘zo warnon distreiñ da Greac’h Gwenn ar bloaz o tont !

Open Tennis Kemper 2013

Posted: 15 C'hwevrer 2013 in Sport
Tikedennoù:,

O paouez divizout emaon e kaozein ivez d’eus sport amañ ur wech an amzer (lâret m’ boa deoc’h, « bevenn ebet »).
Plijet on bet atav gant ar sport. Arvestiñ ouzh a bep seurt traoù a blij din ober, hogen n’on ket ur sportour gourvezvank hepken. C’hweziñ a blij din ober ivez. A bep seurt sportoù ‘m eus bet graet e kleuboù : atleterezh, splujerezh, kleziata, ping-pong, mell-droad, ha dreist-holl mell-dorn, ‘pad seizh bloaz (mankout ‘ra din seul gwech ma welan ur c’hrogad). Er mare-mañ e vezan gourener (dibaoe 7 bloaz) ha c’hoarier mell-droad gouezhelek abaoe ar bloaz-mañ.

An trede bloavezh eo ma c’heller gwelet tennismen a vicher o c’hoari e Kemper.
C’hwec’hvet tournamant Frañs eo bremañ hini kêrbenn Bro-Gerne zoken, hervez an aozerien.
N’eus plac’h ebet c’hoazh ‘vit poent, hogen daou dournamant a zo : simpl ha doubl paotred.
Ur « pass » ‘vit ar sizhun ‘m boa tapet ar bloaz tremenet hag ur blijadur oa bet ‘vidon gwelet o c’hoari Arnaud Clément, Paul-Henri Mathieu pe c’hoazh Igor Sisjling, bet trec’h warlene. An Izelvroad, dianav pe dost d’ar poent-se a zo bet 65vet ar bloaz-mañ hag o paouez frikañ Jo-Wilfried Tsonga emañ e Rotterdam.

Ar bloaz-mañ n’am eus gellet arvestiñ nemet ouzh matchoù ar meurzh noz ha re ar merc’hervezh (hogos an holl). Ma flas am eus tapet dija ‘vit ar gourfennoù (doubl ha simpl) a vo da gaout disul.
War gresk e ya bep bloaz live ar c’hoarierien pedet e Kemper, ha niver an dud o arvestiñ ivez war am eus kredet merzhout.

Pevar « top 100 » a zo ar bloaz-mañ war tachennoù Kreac’h Gwenn : Roberto Bautista-Agut (ESP, 53vet), Gilles Muller (LUX, 69) Steve Darcis (BEL, 94) hag Edouard Roger-Vasselin (FRA, 98). C’hoarierien all, anavezet o anv gant ar re a vourr an tennis da nebeutañ a zo ivez : Igor Kunitsyn (RUS), Marc Gicquel (paotr Sant-Brieg), Florent Serra (FRA), Olivier Rochus (BEL), Adrian Mannarino (FRA), pe c’hoazh Dudi Sela, gwellañ c’hoarier skipailh Israël, bet trec’het ar sizhun paseet gant Frañs er C’hip Davis.

 Skeudenn : An Telegram

Met ouzhpenn estrenien ha tud anavezet a zo, dre ma servij an tournamant-se da galz c’hoarierien da c’hounez poentoù a-benn pignat er renkadur.
Ur c’hoarier evel Kenny De Schepper a oa 390vet daou vloaz-zo p’eo deuet e Kemper ‘vit ar wech kentañ. Ranket en doa neuze tremen dre an troioù-dibab met tizhet en doa ar gourfenn ! 110vet eo bremañ, gounezet un tournamant en deus graet, ‘enep Llodra er gourfenn, ha tremenet un droiad e Wimbledon a-raok koll a-enep David Ferrer !
Dimeurzh da noz eo bet ur gwir blijadur ‘vidon arvestiñ ouzh krogad Maxime Jouan a-enep Igor Kunytsin.
Paotr Vladivostok a zo bet 35vet c’hoarier ar bed ha gounezet en deus dija tournamantoù bras, evel e Moskva, a-enep da v/Marat Safin mar-plij ! C’hoariet en deus ivez evit skipailh Kip Davis Rusia.
E-tal dezhañ, ar Breizhad Romain Jouan 371vet er renkadur ATP. Paotr Landerne en deus graet ur match digredus, betek bezañ trec’h war ar Rusad e tri set ha dirak un engroez tomm-berv.

Foto : An Telegram

Dimeurzh da noz ivez, ur c’hrogad dedennus all, etre niverenn 1 an tournamant, Roberto Bautista-Agut (ESP, 53e) hag ar Belgian Maxime Authom (143vet). Krogad brav, ha souezhus an istor dreist-holl pa ouezer eo mignoned an daou baotr, bet kampion Frañs tennis dre skipailh ar bloaz-mañ gant kleub… Kemperle !
(Deskiñ rit se d’an ampoent marteze ma n’anavezit ket an tennis , ho kenoù digor war nav eur, met ya, Kemperle ‘zo bet kampion kentañ rummad tennis ar bloaz-mañ, dirak holl kêrioù bras Frañs, Pariz, Lyon hag all !).

Plijusañ krogad dec’h a zo bet an hini etre Mathias Bourgue, 19 vloaz, 754vet en ATP (pedet eo bet gant an aozerien) ha Gilles Muller, 69vet c’hoarier ar bed ha niverenn daou an tournamant. Paotr Luksembourg a zo boas da vezañ en top 50, da c’hoari tournamantoù ar chelem bras (¼ an US Open en deus graet dija) ha trec’h eo bet dija war c’hoarierien hollvrudet evel Nadal, Agassi pe c’hoazh Roddick.

N ‘eus ket bet aon Mathias Bourgue ‘vit kement-se, pe n’en deus ket diskouezhet da vihanañ. Diaes evitañ an disoc’h, ha kriz un tamm memes, met brav-eston ar pezh en deus diskouezhet ar paotr ‘pad tri set start a galite uhel : 7-6(2)/5-7/7-6(5). Ma kendalc’h da c’hoari evel-se ar paotr-se e tibrado er renkadur ATP a-benn nebeut.

Foto : DR

Ma plij deoc’h an tennis, pe ar sport dre vras, ma n’emaoc’h ket re bell ha gant amzer vak un tamm, kit d’ober un dro eno. Ouzhpenn-se n’eo ket re ger ar mont-e-barzh : 5€ an devezh, war-bouezh da sadorn ha da sul (10€).
Ur pennad all a vo neuze sur-a-walc’h a-benn nebeut, pa m’bo gwelet ar gourfennoù.
Ma fronostik ? Diaes lâret ken start eo al live met chañsoù o deus Bautista-Agut, Roger-Vasselin, Mannarino pe c’hoazh Dudi Sela da vont pell. Evel just, c’hoant ‘m bije yafe ar Vreizhiz Marc Gicquel ha Romain Jouan ar pellañ posubl met diaes vo ‘m eus aon. Ha ma’m befe nemet un anv da reiñ e vije hini Steve Darcis, ar Belgad, a seblant yac’h-pesk er mare-mañ. Gwelet vo…

M’ho peus c’hoant goût hiroc’h war Open Kemper, kavout an disoc’hoù pe c’hoazh sellet ouzh ar matchoù war eeun : http://www.opendequimper.com/

Reolenn an « no let » :
Goût a rit petra eo al let ? Ur fazi(ig) pa douch ar volotenn ar roued da vare ar servij o tremen dreistañ (poent ebet kollet, just ar servij d’ober en-dro). Gwir eo e c’hell bezañ torr-revr a-wechoù, pa c’hoarvez re alies (ur c’holl amzer e c’hell bezañ neuze). A-benn enebiñ da se en deus divizet an ITF (Kevread etrevroadel an tennis) pleustriñ ur reolenn nevez, simpl-kenañ e gwirionez. Ankouezout reolenn al let, da lâret eo lezel ar c’hoari da genderc’hel ma touch ar volotenn ar roued o tremen dreistañ. E pleustr emañ neuze an traoù e Kemper ar sizhun-mañ hag ur goulennaoueg a zo roet da bep arvester, dezhañ da reiñ e ali. Ne soñj ket din e cheñchfe kalz tra ‘vit lâret gwir, nemet da c’hounit amzer. A-wechoù e vo kollet ar poent gant ar servijer ‘blam d’ar roued, a-wechoù gant ar resever, met evel ma c’hoarvez dija e-kerzh ar c’hoari.

Ratatat / Ratatat (2004)

Posted: 11 C'hwevrer 2013 in Pladennoù
Tikedennoù:

Sonerezh adarre ‘vit cheñch. Kalz a selaouan er mare-mañ, hag a bep seurt met n’hellan ket skrivañ pennadoù war kement tra a glevan, ha ne vefe ket dre ret dedennus ‘vidoc’h.
Divizet ‘m eus neuze komz war ar blog-mañ eus pladennoù ha sonadegoù hepken : kentoc’h traoù a blij din, hag o klask cheñch seurt sonerezh ingal rak n’am eus ket c’hoant skuizhañ ar re a zisplij dezho ar rap, an elektro pe me-oar-me petra.

Ar sonerezh elektro, just a-walc’h, a blij din pe ne ra ket, hervezh an degouezhioù (ledan-tre ar « rumm » ouzphenn-se). N’on ket sot tamm ebet gant an tekno a seurt a glever e Ibiza pe e darn vrasañ an toulloù-noz met un toullad traoù a blij d’am divskouarn memestra (I ♥ Moby). Laouen on bet o welet e oa aet pevar friz gant C2C er « Victoires de la musique », da skouer, Breizhiz anezho ouzhpenn. Petra ? Piv ‘n deus kredet lâret ne oa ket Naoned e Breizh ! Grrrr !

Ur strollad elektro a blij din kalz eo Ratatat.

Un daouad eo e gwirionez, ennañ daou baotr yaouank eus an aval bras (ben ya, New-York, ha Brooklyn memes).
Mike Stroud : gitar, melodika, taboulinoù ha stokelleg ? (ar gêr am eus kavet ‘vit siñtetizeur eo). Opala, ur ger ouzhpenn n’eo ket bet troet gant Martial Ménard ! ^^
Evan Mast : gitar-boud, stokelleg, taboulinoù, ha produer war ar marc’had (nann, ne werzhont ket o fladennoù war ar marc’had, pe ket ken, un dro-lavar eo ^^).

 

O fladenn gentañ eo hennezh, Ratatat ivez e anv, deuet ‘maez e 2004. Ya, n’int ket barrek tamm ebet evit un dra da nebeutañ : kavout un titl d’o fladennoù.

N’eo ket ma hini karetañ ganto (eh ya, kaozeet ‘vo en-dro dioute amañ ‘m eus aon) met plijus-tre eo dija ha ne vezan ket skuizh o selaou anezhi en-dro. Gellout ‘rit selaou ar bladenn ‘vit netra, aze da skouer.

Ar pezh a blij din kalz gant ar strollad-mañ, ouzhpenn da darn vrasañ ar sonennoù, a gavan heson-tre, a zo ar fed m’emaint deuet a-benn da grouiñ ur son dezho, dibar a-walc’h. Ral eo, a gav din, ar strolladoù a c’haller divinout diouzhtu gant piv eo bet graet unan eus o zonioù p’e glever ‘vit ar wech-kentañ. Unan d’eus ar re-se int : ur « son » Ratatat a zo a gav din.

 

(Trug’ da Dudgual evit an dizoloadenn ha da Loïg evit bezañ bet prestet din ar bladenn. 😉 )


Listennad an tonioù :

  1. “Seventeen Years” – 4:26
  2. “El Pico” – 4:41
  3. “Crips” – 3:47
  4. “Desert Eagle” – 4:25
  5. “Everest” – 4:10
  6. “Bustelo” – 2:27
  7. “Breaking Away” – 4:19
  8. “Lapland” – 4:56
  9. “Germany to Germany” – 3:38
  10. “Spanish Armada” – 2:58
  11. “Cherry” – 5:58

Breaking Bad (bloavezh kentañ)

Posted: 5 C'hwevrer 2013 in Stiradoù
Tikedennoù:

Hep kontañ ma buhez deoc’h lakaomp n’on ket paotr an tele (n’am eus ket bet ar benveg milliget-se ba’r gêr pa oan bugel ha n’am eus ket nemeur bremañ). Abaoe ur bloaz bennak e klaskan sellet un tamm muioc’h d’eus filmoù, ha kroget on ivez da sellet stiradoù, met traoù aliet din gant mignoned hepken. Ne c’houzañvan ket ken an eilmouezhiañ setu e sellan an traoù war ma urzhiataer, e yezh orin atav, ha gant istitloù e saozneg peurliesañ, e galleg – c’hoarvezet eo bet din ober gant istitloù brezhonek zoken ! (Trugarez deoc’h An Team Istits !)

Traoù-zo o deus plijet din (Dexter, Justified, My Name is Earl), plijet din kalz (The Wire, Black Books, Longmire), traoù all nebeutoc’h (Misfits, an daou vloavezh kentañ a c’heller gwelet e saozneg gant istitloù brezhoneg dre amañ) pe c’hoazh kalz nebeutoc’h (Six Feet Under). Klask ‘rin kaozeal d’eus ar stiradoù-se amañ tamm-ha-tamm. Met da gregiñ, unan all a blij din kalz : Breaking Bad.

Ur stirad skinwel amerikan eo Breaking Bad, drama kentoc’h, krouet gant Vince Gilligan evit ar chadenn AMC. E 2008 e oa bet skignet eno ar c’houlzad kentañ, seizh pennad o vont d’ober anezhañ.

Ar pempvet bloavezh (an hini diwezhañ sañset) a vez skignet er Stadoù-Unanet er mare-mañ.

Kontañ ‘ra Breaking Bad istor Walter White da gentañ penn.

Ur c’helenner war ar gimiezh 50 vloaz eo. Dimezet eo, ur mab krennard ha nammet en deus ha dougerez eo e wreg. Dizoloiñ ‘ra Walt emañ paket gant ur c’hrign-bev, unan eus ar skevent, ha ken grevus n’haller ket e oberata zoken. Un nebeut mizioù a ro dezhañ ar mezeg, d’ar muiañ tout.
Divizout a ra neuze Walt kuzhat pep tra d’e familh ha klask un doare da c’hounit ar muiañ a arc’hant posubl, da leuskel d’e re pa yelo d’an anaon. E vreur-kaer, Hank, a labour evit an DEA (Drug Enforcement Administration, ar polis enep-dramm kea), a gont dezhañ ordin istorioù tud deuet da vezañ pinvidik-mor gant ar gwerzhañ drammoù. Kalz skiant en deus prenet Walt war ar gimiezh dre e studioù hag e vicher. Hag eñ mont da welet Jesse Pinkman, ur paotr yaouank bet skoliad dezhañ, gwerzherig kanab, da ginnig dezhañ un afer. Prest eo da « geginañ » ‘vitañ « meth » eus ar c’hentañ troc’h (methañfetaminoù, pe c’hoazh kristal, un dramm kreñv ha diouzh ar c’hiz), gant ma vo sikouret gantañ d’e werzhañ. Asantiñ ‘ra buan Jesse ha setu an daou zen da gregiñ gant ur vuhez kuzh, hini ar farderien dramm.

Un tañva ‘po ?

 

Brud vat en deus ar stirad-se. Graet ‘n deus berzh forzh pegement a bep tu d’ar meurvor ha rastellet prizioù e-leizh, setu em boa c’hoant da welet petra oa kaoz (skignet e Frañs war Arte ouzhpenn, setu ‘m eus soñjet ne tleje ket bezañ re vleup). Plijet-tre on bet ivez, ken ma krogin a-benn nebeut an trede bloavezh (eh ya, lipet an eil ganin dija, met kontañ rin se deoc’h diwezhatoc’h).

Donezonet-tre eo an aktourien, dreist-holl an daou « haroz », Bryan Cranston (Walter) hag Aaron Paul (Jesse), hogen, ken barrek all eo an eil rolloù, mab Walt da skouer, Walter Jr (RJ Mitte).

Kalz traoù o deus an daou gomper da guzhat, dreist-holl Walter (e istorioù dramm, hag e grign-bev war ar marc’had). War-nes bezañ tapet e vezont ingal ‘vel-just. Suspens forzh pegement a zo neuze, ur blijadur, gant ur c’hliffangher e fin pep pennad, met ouzhpenn suspens a zo. Evel er vuhez, a bep seurt aozennoù a ya d’ober Breaking Bad, aozennoù mesket ha kempouezet en un doare fin gant Vince Gilligan hag e skipailh senarierien.Ur sell du war ar bed war un tu, met kalzik fent war un tu all, setu n’eo morse re ziaes an arvestiñ. Istorioù feuls a zo (bed an dramm n’eo ket hini ar pokarzhed Bisounours, anat), met mareoù fromus ha karantez a zo ivez, etre Walt hag e wreg da skouer. An darempredoù etre ar c’helenner hag e familh a zo dedennus-tre, al liamm etrezañ ha Jesse ivez. Luzietoc’h-luzietañ e teu an darempredoù etre an tudennoù da vezañ ha psikologiezh pep hini a zo diskouezhet en ur mod soutil.

Sevenet mat eo ouzhpenn-se, gant un doare simpl da filmañ peurliesañ met efedoù deuet brav a-wechoù ha brav eston eo skeudennoù-zo, en dezerzh da skouer.

Ma n’oc’h ket displijet boas gant an istorioù polis ha/pe du un tamm e alian deoc’h groñs ar stirad-mañ, ma n’eo ket bet gwelet ganeoc’h dija evel-just.

Ah ya, just ur ger da echuiñ. Degemeret mat eo ho mennozhioù m’ho peus stiradoù a gavit mat da ginnig din. Kredit lezel din un evezhiadenn, laouen.